Gjuka: Shpresojmë që Besa ta vazhdojë dominimin për shumë vite të tjera

Egzon Gjuka ishte prej lojtarëve të dalluar të Besa Famgasit që të dielën siguroi titullin e gjashtë rresht në Superligën e Kosovës në hendboll.

Besa e mposhti Kastriotin në Ferizaj me rezultat 26-25 dhe kështu me dy fitore në finale të ‘play-offit’ siguroi titullin e kampionit për këtë edicion. Pejanët kanë festuar fillimisht në Ferizaj e më pas festa ka vazhduar edhe në qendër të Pejës. Besa e Kastrioti ishin rivalë të mëdhenj në këtë edicion që është mbyllur me festë të Besës.

“Kemi punuar shumë gjatë këtyre javëve të fundit që të mos na ndodhë përsëri gabimi i njëjtë si në gjysmëfinale të Kupës. Kemi analizuar lojën e Kastriotit dhe kemi punuar shumë që t’i ndalim ferizajasit në pikat kryesore të tyre”, ka thënë Gjuka, citon kosovahandball.info.

Lexo po ashtu Hendboll, Besa Famgas vazhdon dominimin në Superligë fiton sërish titullin

“Është një sukses mjaft i madh për klubin tonë, pasi që gjashtë vite rresht jemi duke u shpallur kampionë të Kosovës. Besoj që këtë dominim do ta vazhdojmë edhe për shumë vite tjera në Kosovë”, ka deklaruar hendbollisti, i cili luan në pozitën e qendrës.

“Ishin ndeshje shumë të forta në finale dhe në dy takimet rezultati ishte shumë i ngushtë. Ajo që ndikoi që ne të bëhemi kampionë ishte përgatitje fizike dhe psikike më e mirë e ekipit tonë e po ashtu eksperienca e lojtarëve në momentet vendimtare. Falënderoj tifozët pejanë dhe BesaBoys për përkrahjen në ndeshjet finale”, ka vazhduar më tej Gjuka.