Gjimshiti: Do të reagojmë ndaj Ukrainës, më pëlqen të vazhdoj në Serie A

Kombëtarja e Shqipërisë pësoi një humbje 3-0 nga Kosova në ndeshjen miqësore të zhvilluar në Zurich të Zvicrës.

Të gjithë në kampin kuq e zi janë ndjerë keq nga kjo humbje dhe kanë premtuar reagimin në ndeshjen e ardhshme.

Mbrojtësi nga Lugina, Berat Gjimshiti tha se ndaj Kosovës ishte një ndeshje e dobët e tyre si ajo me Luksemburgun.

“Me Kosovën ishte ndeshje e dobët si ajo me Luksemburgun, mendoj se gjithmonë mund të reagojmë,besoj se para startit të Nations League mund të provohen disa lojtarë për të treguar vlerat e tyre”.

“Çdo trajner ka mënyrat e veta për të punuar, tani duhet të lëmë pas Kosovën dhe të bëjmë më shumë me Ukrainën,ka rëndësi të përmirësohemi dhe të reagojmë për gabimet që kemi bërë dhe për tifozët”, u shpreh Gjimshiti.

“Ne jemi profesionistë dhe jemi të hapur çdo gjë. Të gjithë lojtarët duan të reagojnë pas figurës së keqe me Kosovën”.

Për sa i përket të ardhmes së tij mbrojtësi i cili sezonin e fundit luajti si i huazuar nga Atalanta te Benevento, la gjithçka të hapur.

“Për momentin nuk kam folur me asnjë. Jam në grumbullim me kombëtaren dhe pastaj do të mendoj për pushimet”.

“Pas pushimeve do të flas me menaxherin tim dhe do të vendosim. Kam dhe një vit kontratë me Atalantën”.

“Në Itali ndihem mirë do më pëlqente të vazhdoja të luaja në Serinë A, por unë jam i hapur ndaj çdo oferte dhe mendoj se do të përshtatesha edhe në një kampionat tjetër”, përfundoi mbrojtësi shtatë lartë. /Telegrafi/