Gjermania në gjendje gatishmërie nëse Polonia sulmohet nga Wagneri përmes Bjellorusisë

Gjermania është zotuar të mbështesë Poloninë, që gjithashtu është pjesë e NATO-s, në rast të një sulmi të mundshëm nga luftëtarët e grupit Wagner përmes Bjellorusisë.

Gjatë një konference për shtyp në Pragë të premten, ministri gjerman i Mbrojtjes, Boris Pistorius iu përgjigj një pyetjeje nëse Gjermania ishte e shqetësuar nga prania e grupit Wagner në Bjellorusi dhe nga perspektiva e një sulmi përgjatë kufirit të Polonisë, transmeton Telegrafi.

“Ne jemi të gjithë bashkë, gjithmonë në koordinim më të ngushtë, jo vetëm kur takohemi fizikisht në nivel si ministra të Mbrojtjes, por edhe ndryshe. Aty ku miqtë tanë polakë kanë nevojë për mbështetje, nëse më e keqja vjen tek më e keqja, ata do ta marrin atë”, u përgjigj Pistorius.

Grupi Wagner është vendosur në Bjellorusi si pjesë e një marrëveshjeje për ndalimin e një rebelimi që kishte bërë javë më parë ndaj udhëheqjes ushtarake ruse.

Të mërkurën, shefi i Wagner-it, Yevgeny Prigozhin, u pa me sa duket në një video duke përshëndetur trupat e tij në vend.

Ministria e Mbrojtjes e Bjellorusisë tha të enjten se forcat bjelloruse do të zhvillojnë stërvitje të përbashkëta ushtarake me luftëtarët e grupit Wagner pranë kufirit polak.

Agjencia kombëtare e lajmeve e Polonisë PAP raportoi të premten se Polonia do të zhvendosë formacionet e saj ushtarake nga perëndimi në lindje të vendit, duke cituar kreun e komitetit të sigurisë së Polonisë, Zbigniew Hoffmann. /Telegrafi/