Fury mendon të ndjekë hapat e Klitschkos dhe të boksojë deri në moshën 40 vjeçare

Tyson Fury konsideron se mund ta përsëritë suksesin e Wladimir Klitschko si mbret në kategorinë e peshave të rënda dhe se mund të boksojë deri në moshën 40 vjeçare.

Gypsy King i jep vetes merita se ia ndryshoi kahun këtij divizioni, i cili ishte dominuar me vite të tëra nga vëllezërit Klitschko – kur ia rrëmbeu titujt Wladimirit në vitin 2015.

Pas problemeve të shëndetit mental, 31-vjeçari është kthyer sërish në maje duke u shpallur kampion bote në WBC falë triumfit mbresëlënës ndaj Deontay Wilder, ndërkohë që vazhdon të jetë boksieri i vetëm i pamposhtur në kategorinë e peshave të rënda.

Fury kishte thënë se do t’i zhvillonte edhe vetëm dy meçe të mëdha – kompletimin e trilogjisë ndaj Wilderit dhe unifikimin e titujve me Anthony Joshua. Megjithatë duket se ka ndërruar mendje.

“E kam fituar secilin rrip në boks. Nga titulli anglez deri në shpalljen kampion i padiskutueshëm botëror. Të gjitha të bëra, të gjitha të kryera. I konsideruar më i miri, e kryer”.

“Nëse nuk boksoj më, jam i lumtur, por nëse boksoj sërish, atëherë do të vazhdoj të boksoj… Klitschko e bëri deri në moshën 40 vjeçare. Shumë kampionë të mëdhenj vazhdojnë dhe vazhdojnë”.

“Unë nuk boksoj për para, nuk boksoj për famë, nuk boksoj për një rrip. Boksoj sepse më mban të lumtur mendërisht dhe më pëlqen ta bëj”, ka deklaruar Fury për Sky Sports. /Telegrafi/