Fondi i kthen paratë e shpenzuara për mjekim gjatë pushimeve verore jashtë shtetit!

Qytetarët që preferojnë pushimet verore t’i kalojnë jashtë shtetit, përveç përgatitjeve tjera janë të obliguar me ligj të jenë të mbuluar nga aspekti mjekësor.

Disa lehtësime për këtë i mundëson Fondi Shëndetësor, i cili ka nënshkruar marrëveshje me shtete të rajonit dhe Bashkimit Evropian.

Drejtori i Fondit, Orhan Ramadani, thotë se me një formular nga mjeku amë dhe me konstatimin e komisionit të mjekëve nga ky institucion, qytetarëve do t’ju kthehen paratë që i kanë shpenzuar për mjekim.

“Njëkohësisht ju takojnë shërbimet jashtë shtetit, për nevoja të domosdoshme , nëse ka ndonjë kokë dhimbje, nëse ndodh ndonjë ndeshje në komunikacion, do të thotë secili ka sigurim. Të gjitha sëmundjet, të cilat janë të paparashikuara, të them kushtimisht edhe zorra qorre dhe ndonjë sëmundje tjetër që nuk mund të parashikohet, por dashtë e pa dashtë duhet të operohet, të gjitha këto raste do të mbulohen nga Fondi shëndetësor i Maqedonisë”, tha ai.

Sigurimet private shëndetësore për klientët e tyre kanë oferta të ndryshme, për shërbimet jashtë shtetit amë. Mirëpo, shtatzënat dhe personat mbi 65 vjeç, nuk mbulohen me këto polica sigurimi.

Liridona Aliu, agjente sigurimesh për turizëm thotë se për polisen 2 euro, sigurimi mbulon shpenzimet që janë vetëm mbi 200 euro.

Kjo i bie se çdo shërbim mjekësor nën 200 euro, nuk mbulohet nga polica e sigurimit.

Aliu thekson se, janë të rralla rastet kur qytetarët e kalojnë shumën prej 200 euro, për ndonjë shërbim mjekësor.

Ajo tërheq vëmendjen se kanë has edhe në dallavere që janë bërë nga klientët, që janë paraqitur të sëmurë dhe kanë keqpërdor policat e sigurimit.

“Nuk janë të vetëdijshëm për shkak se sigurimi shëndetësor është patjetër t’i kenë për të mirën e tyre. Edhe pse tek ne janë keqpërdor këto sigurime, për shkak se udhëtarët kanë qenë të lënduar prej këtu dhe kanë bërë disa kombinime atje”, shprehet ajo.

Drejtori i Fondit për Sigurime Shëndetësore, sqaron se nga ky sezon turistik, do t’ju kthehen shpenzimet për mjek, atyre që pushimet i kalojnë në Shqipëri, por jo edhe për ata që verës shkojnë në Greqi.

Sipas Fondit, gjatë vitit të kaluar nga qytetarët janë tërhequr rreth 40 mijë formularë për shërim jashtë shtetit. /Telegrafi/