Flasin profesorët e dyshuar për plagjiaturë në UP

Pesë profesorë të Universitetit të Prishtinës ‘Hasan Prishtina’ janë deklaruar lidhur me akuzat për plagjiat në punimet e tyre shkencore

Më 21 shtator organizata ‘ADMOVERE’ kishte publikuar një raport rreth stafit akademik të Universitetit të Prishtinës “Hasan Prishtina”, ku mes tjerash kishte përfshirë edhe një kapitull të titulluar “Plagjiaturat e stafit akademik”, në të cilin përmendeshin emrat e 16 profesorëve që kanë qenë ose janë pjesë e stafit akademik që sipas tyre janë të përfshirë në skandale të plagjiaturës dhe nuk janë ndëshkuar asnjëherë për këtë shkelje akademike.

Kallxo.com ka arritur të kontaktojë me disa prej këtyre profesorëve të cilët vazhdojnë ta mohojnë se kanë kryer plagjiaturë në punimet e tyre.

E për këtë çështje, pavarësisht se gazeta ka provuar të kontaktojë me Rektoratin e UP-së, ata nuk kanë kthyer përgjigje rreth këtij raporti dhe profesorëve që kanë qenë dhe janë të punësuar në UP.

Profesori në Fakultetin e Mjekësisë, Arsim Morina tha se për të shkruar një libër duhet marrë prej literaturës së mëhershme, madje sipas tij, në një libër kapitujt mund të shkruhen nga autorë të ndryshëm.

“Nuk di person në botë që nuk shërbehet me literaturë të huaj, kurse sa i përket bashkëshortes sime ajo e ka kapitullin prej anestezisë, vetë që e ka shkruar, jo unë që ia kam marrë asaj, por në një libër një kapitull mund ta shkruajë një person tjetër. Është i cituar emri në libër shkruan kapitulli Qamile Morina. Çdo kund mund të merren fjali.”, ka thënë Morina.

Sipas këtij profesori, libri nuk i ka shërbyer për avancim sepse thotë se ishte zgjedhur si profesor i rregullt para se të botohet ai.

Anëtari i Këshillit Drejtues të Universitetit të Prishtinës, Beqir Sadikaj, i cili është edhe profesor në Fakultetin Juridik, mohoi raportin i cili thotë se ai kishte kopjuar në tërësi librin e përkthyer në serbisht nga autori Georges Gurvitch i titulluar “Sociologjia Juridike”.

“Jo, gabim e ki krejt”, tha Sadikaj.

Ndërkaq, Dalip Limani, i cili aktualisht është profesor në Fakultetin e Mjekësisë tha se nuk është e vërtetë që në librin e tij “Kirurgjia abdominale”, ka kopjuar një kapitull të tërë nga libri “Kirurgjia” e autorit kroat Ivan Prpic.

“Nuk është e vërtetë edhe në pension jam tash. Jo jo, nuk kam marrë”, tha Limani.

Për profesorin e Fakultetit të Ekonomisë, Muhamet Aliu trajtimi i temës së plagjiaturës në doktoratën e tij është harxhuar.

Sipas raportit, Aliu kishte kopjuar gjithsej 20 faqe në punimin e doktoratës nga punimi i kolegut të tij, Skënder Ahmeti.

E për këtë çështje ai tha se raportimi i këtij rasti ishte tendencioz.

“Kjo ka qenë edhe ma herët dhe për këtë temë jemi konsumuar në aspektin profesional të universitetit. Të gjitha shënimet dhe shkresat që i kanë kërkuar i kemi dorëzuar dhe është mbyllur që në 2015-ën kjo çështje. Jo bre s’është e vërtetë, ajo ka qenë vetëm një, tash ku me dit çka ka qenë, ka qenë tendencioze dhe krejt diçka tjetër është aty, nuk është ashtu.”, ka thënë Aliu.

Përkundër kandidatëve të përmendur deri tani, rasti i profesorit të Fakultetit të Mjekësisë, Sylejman Rexhepi është plotësisht ndryshe. Në raportin “Stafi akademik i UP-së”, thuhet se Rexhepi kishte përkthyer fjalë për fjalë librin “Reumatologjia” të autorit gjerman Hans-Jurgen Hettenkofer dhe se autori i kishte shkruar UP-së ku iu kishte thënë që profesori Rexhepi kishte kërkuar falje.

Por, profesori nuk e thotë të njëjtën, tha  se nuk kishte kërkuar falje dhe se libri vazhdon të përdoret nga studentët.

“Komisioni i cili ka punuar ka konstatuar se libri nuk është plagjiaturë dhe këtë të njëjtën edhe rektori i atëhershëm e ka vërtetu që unë pas një periudhe shumë të shkurtë dhe pas atij dyshimi jam kthyer në proces mësimorë. Libri është i dobishëm dhe shfrytëzohet nga studentët dhe nuk ka asnjë vërejtje që kam dëgjuar deri më tash.

Unë nuk kam kërkuar falje por në gjithë atë rrëmujë rreth librit është dhënë sqarimi se komisioni i universitetit të Prishtinës e ka botu dhe e ka konfirmuar se nuk është plagjiaturë, libri edhe më tej lexohet”, përfundoi Rexhepi.

Më poshtë mund të gjeni edhe listën e plotë të këtyre profesorëve që dyshohet se kanë kryer plagjiaturë:

Ali Dida – ish-profesor në Fakultetin Filozofik, Universiteti i Prishtinës

Arsim Morina – profesor i rregullt në Fakultetin e Mjekësisë, Universiteti i Prishtinës

Beqir Sadikaj – profesor i rregullt në Fakultetin Juridik, Universiteti i Prishtinës; anëtar i Këshillit Drejtues të UP-së; ish dekan i Fakultetit Juridik; ish kryetar i Senatit të UP-së

Dalip Limani – ish profesor i Fakultetit të Mjekësisë, Universiteti i Prishtinës

Drita Konxheli – Profesoreshë e asocuar në Fakultetin Ekonomik, Universiteti i Prishtinës

Hajredin Kuçi – profesor i rregullt në Fakultetin Juridik, Universiteti i Prishtinës, ish-prorektor i UP-së

Kadri Metaj – Profesor i rregullt në Fakultetin Filozofik, Universiteti i Prishtinës

Lindita Sejdiu Rugova – profesoreshë e asocuar në Fakultetin e Filologjisë dhe Dekane e Fakultetit të Filologjisë

Luan Ahma – Profesor i rregullt në Fakultetin e Inxhinierisë Elektrike dhe Kompjuterike, Universiteti i Prishtinës; shef i departamentit të Telekomunikacionit

Mejdi Bektashi – profesor i asocuar në Fakultetin Juridik, Universiteti i Prishtinës

Muhamet Aliu – Profesor asistent në Fakultetin Ekonomik, Universiteti i Prishtinës

Sabri Hamiti – profesor i pensionuar i angazhuar në Fakultetin e Filologjisë, ish-profesor me marrëdhënie të rregullt pune në këtë fakultet; anëtar i Akademisë së Shkencave e Arteve të Kosovës

Sabri Limari – ish profesor i Fakultetit të Inxhinierisë Elektrike dhe Kompjuterike, Universiteti i Prishtinës

Selim Bezeraj – Profesor asistent në Fakultetin Filozofik, Universiteti i Prishtinës; Shef i departamentit të Historisë

Sylejman Rexhepi – profesor i asocuar në Fakultetin e Mjekësisë

Venet Shala – ish bashkëpunëtor i jashtëm në Fakultetin Ekonomik, Universiteti i Prishtinës

Zeqir Veselaj – Profesor i Asocuar në Fakultetin e Edukimit, Universiteti i Prishtinës dhe anëtar i Këshillit Drejtues i UP-së

Gazeta ka provuar të marrë qëndrimet edhe të 11 profesorëve të tjerë të apostrofuar por të njëjtit nuk kanë qenë të qasshëm deri në publikimin e këtij artikulli. /Kallxo.com/