Fjalët që Zelensky u tha liderëve të G7 gjatë takimit të sotëm urgjent

Duke iu drejtuar vendeve të G7 përmes videokonferencës të enjten, presidenti ukrainas Volodymyr Zelensky u tha atyre se ata mund të ishin një “grup i madh paqeruajtësish” duke rritur sanksionet dhe duke krijuar një shoqatë të re të quajtur U-24.

Më herët të enjten, Zelensky gjithashtu iu drejtua virtualisht liderëve të NATO-s.

“Ne mund ta bëjmë grupin tuaj G7 jo vetëm një shtatëshe të shkëlqyer, por një grup të madh paqeruajtësish, një shtatëshe paqeruajtësish të shkëlqyer. Çfarë na duhet? Ukraina është shumë specifike për t’iu përgjigjur kësaj pyetjeje. Çdo javë ne duhet të shtojmë sanksionet kundër agresionit rus derisa ai të përfundojë dhe paqja të rivendoset”, u tha Zelensky vendeve të G7, përcjell Telegrafi.

Ai shtoi: “Më pas, ne duhet të krijojmë një sistem të ri garancish sigurie për Ukrainën dhe rajonin tonë”.

Lexo po ashtu G7 është gati të aplikojë 'sanksione shtesë' kundër Rusisë - këto janë disa nga pikat kryesore të samitit

“Garanci efektive që mund të ndalojnë çdo agresion brenda 24 orëve. Brenda 24 orëve, ne kemi propozuar një grup, një U-24. Diçka për të cilën bota ka nevojë jo vetëm për të parandaluar luftërat, por edhe për të ndalur armiqësitë aktive që tashmë kanë filluar dhe gjithashtu për të ofruar mbështetje për ato vende që vuajnë nga fatkeqësitë natyrore ose kanë nevojë për mbështetje gjatë pandemive ose që përballen me kriza migracioni ose ushqimore”.

Zelensky pyeti liderët se sa samite urgjente do të duhej të mbaheshin derisa të zgjidheshin problemet e krijuara nga Rusia.

“Në vitet e fundit, Rusia ka arritur të krijojë aq shumë kriza dhe aq shumë destabilitet sa është bërë problemi kryesor për botën. Një problem që vetëm sa po rritet dhe ne as nuk mund ta hamendësojmë se sa samite të tilla urgjente do të duhej të mbaheshin përpara se të zgjidheshin problemet e krijuara nga Rusia”, tha Zelensky në takimin e G7.

Presidenti i Ukrainës paralajmëroi vendet e G7 se veprimet e Rusisë në Ukrainë po çonin në një krizë globale ushqimore.

“Rusia ka shkatërruar arkitekturën globale të sigurisë dhe i ka dhënë një goditje të fuqishme marrëdhënieve ndërkombëtare. Por ky është vetëm fillimi. Kjo luftë mund të pasohet nga një krizë globale ushqimore. Sa më gjatë të mos ketë paqe në tokën ukrainase, aq më pak ushqim do të marrë tregu botëror nga Ukraina dhe shumë vende në Azi, Afrikë dhe madje edhe Evropë mund të vuajnë probleme ekstreme me qasjen në ushqimet bazë dhe çmimet e ushqimit. Kjo patjetër do të rezultojë në destabilizimin politik dhe ndoshta ky ishte qëllimi i udhëheqjes ruse. Nuk e di”, tha Zelensky.

“Por ne duhet të veprojmë menjëherë. Ne duhet të ndalojmë menjëherë trupat ruse dhe t’i nxjerrim ato nga Ukraina. Ne kemi nevojë për paqe të menjëhershme përpara se bota të përballet me një nivel tjetër problemesh. Është më mirë të përdoren sanksionet kundër Rusisë tani sa më shumë që të jetë e mundur për të ndaluar makinën e saj ushtarake sesa më vonë për t’u marrë me pasojat e një krize globale ushqimore”, shtoi presidenti ukrainas.

Lexo po ashtu Zelensky kërkon 1% të aeroplanëve, tankeve dhe armëve të tjera të NATO-s

Zelensky bëri thirrje për një “embargo të plotë të tregtisë” me Rusinë dhe për të parandaluar Rusinë nga përdorimi i sistemit GPS.

“Sfidat e paprecedenta kërkojnë një embargo të plotë për tregtinë me Rusinë. Rusisë duhet t’i hiqet mundësia për të përdorur edhe GPS në luftë. Është e rëndësishme që ky sistem të mos ndihmojë raketat dhe bombat ruse të shkatërrojnë qytete paqësore”, tha Zelensky.

“Bankat ruse dhe kryesisht Banka Qendrore e Rusisë duhet të bllokohen plotësisht nga sistemi financiar global. Kriminelët e luftës duhet të lihen pa para dhe asetet e tyre të ngrira duhet të kthehen gjithashtu në dëmshpërblime”, u tha ai vendeve të G7.

“Kjo është në interesin tonë, është në interesin tuaj. Është në interes të të gjitha demokracive, sepse demokracitë duhet të jenë në gjendje të mbrojnë veten… Jeta duhet të triumfojë mbi vdekjen”, tha Zelensky.

Presidenti i Ukrainës akuzoi sërish Rusinë për përdorimin e municioneve me fosfor, disa përdorime të të cilave ose janë të ndaluara ose të kufizuara sipas ligjit ndërkombëtar.

Këto pretendime, CNN shkruan se nuk është në gjendje t’i verifikojë.

Departamenti Amerikan i Shtetit i tha gjithashtu CNN se ishte në dijeni të raporteve, por tha se nuk ishte në gjendje të konfirmonte. /Telegrafi/