Feronikeli në mesnatë pritet ta rifilloj prodhimin

Kompania Feronikeli do të rifillojë prodhimin sonte në mesnatë, ka deklaruar kryetari i Sindikatës së Punëtorëve të kësaj kompanie, Fehmi Nika. Feronikeli ka rreth 6 muaj që e kishte ndalur prodhimin, kurse së fundi është blerë nga miliarderi shqiptar, Samir Mane.

Kompania e biznesmenit Samir Mane, “Group Balfin”, as një muaj nga konfirmimi se ka blerë shumicën e aksioneve të gjigantit metalurgjik “Feronikel”, ka bërë që të rifillojë puna. Punëtorët që nga dje janë në vendet e tyre të punës, kurse sonte do të rifillojë edhe prodhimi, ka konfirmuar për Radio Kosovën kryetari i Sindikatës së Punëtorëve, Fehmi Nika.

“Në Feronikel nga dje çdo gjë është kthyer në vendin e vet, është normalizuar dhe punëtorët kanë filluar me ndërrime ashtu si ka qenë më herët, kështu që prodhimi faktikisht fillon prej orës 24 sonte në mbrëmje. Kështu që pas ndërrimit të pronarit në Feronikel, çdo gjë është normalizuar”, tha Nika.

Sipas tij, ndërrimi i pronarit ka bërë që të kryhen edhe obligimet ndaj punëtorëve.

“Sa i përket obligimeve ndaj punëtorëve janë kryer rrogat e punëtorëve. Kështu që veç mbetet rroga e korrikut që është afati deri më 15’in që t’u paguhet punëtorëve”, tha Nika.

Ai më tej theksoi se punëtorët janë të kënaqur për rifillimin e punës dhe presin ditë më të mira në këtë gjigant metalurgjik. Edhe vetë “Gupi Balfin” që e ka blerë tashmë Feronikelin, thotë se “ka planifikuar të kryejë investime shtesë në kompani, në mënyrë që potenciali i sektorit minerar në Shqipëri dhe Kosovë të mund të vihet në përdorim në mënyrë të plotë dhe për ta rritur prodhimin e nikelit nga 7200 ton në vit, në mbi 10 000 ton në vit. /RadioKosova/Telegrafi/