E shpallin “të vdekur” në lajmet e rreme, reagon gazetarja Aida Shtino: Ata që lënduan pa të drejtë, do të vuajnë

Çdo ditë e më shumë personazhe të ndryshëm po bien pre e lajmeve të rreme në rrjetet sociale.

E radhës ka qenë gazetarja e njohur Aida Shtino, njëherësh ish-prezantuese e emisionit “Njerëz të humbur”.

Gazetarja e cila me vite të tëra u ka gjetur njerëzve personin e tyre të dashur duke ua kthyer në shtëpi, është dashur që gjatë ditës së sotme të ‘vihet në kërkim’ të vetvetes, pasi siç thotë ajo pasi pa lajmin rreth “vdekjes së saj”, as ajo vet nuk e kuptoi se çfarë kishte ndodhur me të.

Në një reagim të publikuar në rrjetin social Instagram, Shtino tregoi se është mirë me shëndet, ndërsa ngre pikëpyetjet për ata që e bënë këtë gjë.

“Askush nuk i iken ndeshkimit te te pafajshmit….besoj se larg a vone te gjithe ata qe te lenduan pa te drejte, do te vuajne… Sot ne mengjes sa ngrihem dhe shikoj nje lajm qe ishte publikuar ne “mediat” tona se kisha vdekur. Ngela. Mendova me vete mos kam vdekur jam ne Parajse dhe gjithe kete skene po e shikoj andej?…Apo mos jam ne enderr?…Pickova veten te kuptoja…. Isha ne rregull. Pulsi me punonte. Zemra po. Isha gjalle. Po kush e publikoi? Pse?” (sic.), ka shkruar ajo në Instagram.

Vet Aida Shtino muaj më parë në një intervistë për Telegrafin, tha se pas shumë kohe asaj i është ringjallur dëshira për të nisur episodet e reja të emisionit “Njerëz të humbur”, duke shpresuar se në një të ardhme të afërt do ta rikthejë atë.

Lexo po ashtu Aida Shtino, nga ke "humbur"?

Ajo ka disa vite që është tërhequr nga televizioni dhe jeton në Tiranë, ndërsa është në përgatitje të një libri, të cilin pret ta publikojë së shpejti. /Telegrafi/