Drejtori sportiv i Olympique Marseille, Mehdi Benatia, ka reaguar ashpër pas humbjes 2-1 të skuadrës franceze kundër Real Madridit në Ligën e Kampionëve, duke e krahasuar penalltinë e dytë të dhënë për “Los Blancos” me atë të famshmen që përjetoi shtatë vite më parë si lojtar i Juventusit.
Në ndeshjen e zhvilluar të martën, Real Madrid përfitoi dy penallti, të dyja të realizuara nga Kylian Mbappé. Vendimi i gjyqtarit Irfan Peljto për goditjen e dytë nga pika e bardhë u cilësua skandaloz nga Marseille.
Trajneri i francezëve, Roberto De Zerbi, e quajti vendimin “të turpshëm”, ndërsa Benatia kujtoi momentin e vitit 2018, kur në “Santiago Bernabeu” iu dha një penallti e ngjashme në dëm të Juventusit.
“Është shumë e vështirë ta pranosh, por e përjetova shtatë vjet më parë. Nuk kisha qenë këtu për shtatë vjet, por u ktheva dhe u largova me të njëjtën ndjenjë. E pashë lojtarin tim të prekte topin, duke bërë një ndërhyrje të drejtë. Është e vërtetë që krahu i tij ishte aty, por ose e presim, ose është e pamundur ta shmangim”, u shpreh Benatia për mediat franceze.
Benatia i referohej ndeshjes çerekfinale të Ligës së Kampionëve mes Juventusit dhe Real Madridit, ku bardhezinjtë barazuan rezultatin e përgjithshëm 3-3 pas humbjes 3-0 në Torino.
- YouTube www.youtube.com
Në minutat e fundit, gjyqtari anglez Michael Oliver akordoi një penallti për një shtytje të Benatias ndaj Lucas Vázquez. Cristiano Ronaldo e shndërroi në gol, duke eliminuar Juventusin dhe shkaktuar polemika të mëdha në Itali dhe më gjerë. /Telegrafi/
