Dyshime për keqpërdorime nga Ministria e Shëndetësisë, Reshitaj thotë se më 4 qershor do të formohet komisioni hetimor

Kryetarja e Komisionit për Shëndetësi dhe Mirëqenie Sociale, Albena Reshitaj, ka thënë se më 4 qershor do të formohet një komision hetues parlamentar i cili do të hetojë se si është bërë menaxhimi i COVID-19, në Kosovë.

Reshitaj pohoi se sot kanë pasur të ftuar në komision, sekretarin e përgjithshëm të Ministrisë së Shëndetësisë, Naim Bardhiqin, i cili ka raportuar për menaxhimin e situatës me coronavirus, transmeton Telegrafi.

“Është vendosur që Kuvendi i Kosovës më 4 qershor të formojë komisionin hetues parlamentar që të hetojë menaxhimin e pandemisë COVID-19. Kjo është një e mirë sepse do të hetohen të gjitha procedurat, dhe do të del e vërteta lidhur me menaxhimin e COVID-19”, tha Reshitaj para mediave, përcjell Telegrafi.

Reshitaj tha se anëtarët e Komisionit për Shëndetësi dhe Mirëqenie Sociale kanë kërkuar që prokuroria t’i hetojë disa materiale për keqmenaxhimin e situatës me pandeminë, por që nuk është arritur të votohet.

“U kërkua nga komisioni që të votohet që të gjitha dokumentet të përcjellën në Prokurori dhe që prokuroria të merret me to, por anëtarët e LVV-së u larguan nga komisioni kur deshëm që të votohet kjo, pra nuk arritëm ta votojmë për shkak të kuorumit”, tha ajo./Telegrafi/