Drejtori i policisë i kërkon falje japonezit, që i kaloi mbi 50 vjet në burg për krimin që nuk e kishte kryer

Një shef i policisë japoneze i ka kërkuar falje personalisht një burri që kaloi 58 vjet në burg për një krim që nuk e kreu.

Iwao Hakamada, 88 vjeç, u mbajt në dënim me vdekje për më shumë se 50 prej atyre viteve përpara se të lirohej në një rigjykim muajin e kaluar.

Gjykata e Qarkut Shizuoka tha se policia dhe prokurorët kishin bashkëpunuar për të fabrikuar dhe vendosur prova kundër ish-boksierit, dhe kishin përdorur dhunë për ta detyruar atë të rrëfehej.

Shefi i policisë prefekturale të Shizuoka, Takayoshi Tsuda, vizitoi Hakamada në shtëpinë e tij për të kërkuar falje personalisht të hënën, transmeton Telegrafi.

Duke qëndruar përballë Hakamada, oficeri u përkul dhe tha: “Na vjen keq që ju kemi shkaktuar shqetësime dhe barrë të papërshkrueshme mendore për 58 vjet. Na vjen shumë keq”.

Hakamada, i cili ka problem të zhvillojë biseda për shkak të gjendjes së tij mendore prej dekadash në dënim me vdekje, tha: “Çfarë do të thotë të kesh autoritet… Pasi të kesh fuqinë, nuk duhet të ankohesh”.

Motra 91-vjeçare e Hakamada, Hideko Hakamada, e cila i kishte qëndruar pranë vëllait të saj gjatë procesit të gjatë për të pastruar emrin e tij dhe tani jeton me të, falënderoi shefin e policisë që i kishte vizituar.

Ajo u tha gazetarëve se nuk kishte kuptim t’i ankohej atij pas gjithë këtyre viteve, pasi shefi Tsuda “nuk ishte i përfshirë në këtë çështje dhe ai erdhi këtu vetëm si detyrë”.

Hakamada u dënua me vdekje në vitin 1968 për vrasjen e ish-shefit të tij, një ekzekutiv në një kompani, gruan e tij, dy nga fëmijët e tyre dhe për zjarrvënie të shtëpisë së tyre në Hamamatsu.

Ai shmangu ekzekutimin për shkak të procesit të gjatë të apelimit dhe rigjykimit, që do të thoshte se ai kishte qenë në burg për 27 vjet në kohën kur apeli i tij i parë për një rigjykim u refuzua.

Apeli i tij i dytë për një rigjykim, i paraqitur nga motra e tij në vitin 2008, u miratua në vitin 2014. /Telegrafi/