Departamenti amerikan i Shtetit: Marrëveshja Kosovë-Serbi, një hap drejt përparimit të Ballkanit Perëndimor

Shtetet e Bashkuara të Amerikës kanë vlerësuar arritjen e marrëveshjes historike në Shtëpinë e Bardhë mes Kosovës dhe Serbisë, e cila adreson një gamë të gjerë çështjesh të normalizimit ekonomik, është thënë përmes një deklarate të Departamentit të Shtetit.

Marrëveshjet u sjellin qytetarëve zhvillim dhe punë, por gjithashtu vendos një ton të ri të pajtimit, i cili do të bëjë të përparojë Ballkani Perëndimor, sipas Departamentit të Shtetit.

Shtohet se marrëveshjet e djeshme hapin mundësi të reja për bashkëpunim më të gjerë, transmeton Telegrafi.

“Shtetet e Bashkuara riafirmojnë mbështetjen e tyre për negociatat e vazhdueshme midis Kosovës dhe Serbisë në drejtim të normalizimit gjithëpërfshirës të marrëdhënieve”, shkruan në deklaratë.

Shtetet e Bashkuara gjithashtu përgëzuan kryeministrin Hoti për “arritjen monumentale të normalizimit të lidhjeve dhe njohjes reciproke midis Kosovës dhe Izraelit”, si dhe presidentin Vuçiq për hapjen e një zyre tregtare dhe zhvendosjen e ambasadës së Serbisë për në Jeruzalem.

Lexo po ashtu Netanyahu pas njohjes së Kosovës nga Izraeli: Vendi i parë me shumicë myslimane që do të hap ambasadë në Jeruzalem

“Këto hapa të guximshëm do të përmirësojnë paqen midis partnerëve tanë në Evropë dhe Lindjen e Mesme”, shkruan më tutje.

Siguria, stabiliteti dhe prosperiteti në të gjithë Ballkanin Perëndimor mbeten qëllimet kryesore të Shteteve të Bashkuara. Me mbështetjen e presidentit Donald Trump, kryeministri Hoti dhe presidenti Vuçiq kanë bërë hapa të mëdhenj drejt këtij vizioni të përbashkët, përfundon Departamenti i Shtetit. /Telegrafi/