Deklaratë publike e Bankës TEB

Mediat në Kosovë kanë raportuar gjatë ditës së enjte se mbi 3000 euro, për dy muaj, po dyshohet t’u janë vjedhur nëntë klientëve të TEB Bankës nga një punonjëse e kësaj banke në Ferizaj.

Po sipas mediave, analistja e klientëve është arrestuar para tri javësh nga Policia për plaçkitjet në xhirollogari bankare, që i ka kryer çdo të enjte, gjatë periudhës shtator-nëntor të vitit të kaluar.

Ndërkohë Banka TEB Sh.A. përmes një sqarimi informon gjithë klientët e vet, mediat dhe opinionin e Kosovës në lidhje me raportimet e djeshme në media.

Sipas njoftimit, Banka TEB Sh.A. njofton klientët e vet dhe opinionin se në momentin që ka identifikuar rastin nga organet e saj të brendshme të kontrollit, ka ndërmarr masat e duhura: duke mbrojtur klientët dhe kompensuar ata, largimin e punëtores në fjalë nga puna dhe dërgimin e rastit tek policia për investigim të plotë.

“Njoftojmë opinionin se kontrolli i brendshëm i Bankës TEB Sh.A. është në nivelin më të lartë, siç është dëshmuar edhe në këtë rast, duke zbuluar e dërguar vet rastin tek organet e policisë dhe që ka ofruar bashkëpunim të plotë me organet e tyre, tutje i mbetet organeve të drejtësisë të japin verdiktin final”, thuhet në sqarimin e Bankës TEB.

“Banka TEB Sh.A. është pjesë e grupit ndërkombëtar bankar BNP Paribas dhe sigurojmë të gjithë klientët tonë se afarizmi i jonë është i bazuar në praktikat më të larta profesionale nga grupi të cilit i takojmë”, përfundohet në sqarim. /Telegrafi/