Deklarata Kushtetuese shprehu vullnetin e akumuluar për liri

Shpallja e deklaratës kushtetuese ka qenë vullneti absolut i gjithë shqiptarëve të Kosovës për të përcaktuar pozitën kushtetuese dhe juridike të Republikës së Kosovës.

Kështu thanë delegatët, të cilët 26 vite më parë kanë shpallur deklaratën Kushtetuese të Kosovës.

Deklaratës Kushtetuese të 2 Korrikut 1990 i kishin paraprirë unifikimi i plotë i faktorit shqiptar në Kosovë, kërkesat gjithëpopullore për Kosovën Republikë, për liri e pavarësi, konfrontimi i hapur i institucioneve të Kosovës me ato të Serbisë, Deklarata e Akademisë së Shkencave dhe të Arteve të Kosovës për pozitën e re kushtetuese të Kosovës, si dhe qëndrimet e Këshillit ndërpartiak të Kosovës, të cilat ishin në të njëjtën frymë, me vizionin e Kosovës së pavarur.

Për këtë ditë të veçantë, kryetari i Kuvendit të Kosovës, Kadri Veseli kishte përgatitur një pritje solemne për të gjitha delegatët për të shprehur mirënjohje për kontributin e tyre të dhënë për lirin e vendit.

Kryeparlamentari Veseli në një fjalë rasti tha se 26 vite më parë, delegatët nderuan kombin tonë.

“Këta burra dhe këto gra të cilat 26 vjet më herët dëgjuan thirrjen e popullit dhe morën një nga vendimet më të rëndësishme historike të historisë së re të popullit shqiptar në ish-Jugosllavi. Ata e kanë nderuar veten, familjen e vetë dhe më së shumti e kanë nderuar kombin tonë, duke treguar se statusi politik i shqiptarëve duhet të ndryshonte, se shqiptarët kërkonin të drejta të barabarta me të gjithë qytetarët me ish-Republikën e atëhershme Federative Jugosllave. I përkujtojmë të gjithë ata që nuk janë më me ne, të cilët kanë qenë deputetë të cilët e kanë shpallur në atë kohë Republikën e Kosovës më 2 Korrik 1990 dhe sot nuk janë në mesin tonë. I thërras edhe kolegët e mijë politik që janë në parlamentin e Kosovës që të mos ngarendin shumë të respektojnë datat e të tjerëve, të vijnë ta respektojnë edhe datat e vetë. Sot është për kritik që shumë pak koleg deputet të këtij Kuvendi edhe nuk po vijnë në seancë por edhe në të njëjtën kohë nuk po vijnë të shënojnë historinë e vet”, tha Veseli.

Kryetari i Kuvendit në vitin 1990, Iljaz Ramajli tha se shpallja e Deklaratës Kushtetuese ka qenë vullnet i mirë i të gjithë shqiptarëve.

Delegat i shpalljes së Deklaratës Kushtetues të vitit 1990, ishte edhe Muharrem Shabani, i cili tha se mos harresa e kësaj dite është mos harresë e kontributit të popullit shqiptar. Ai kërkojë nga institucionet e vendit që të tregojnë kujdes më të madh për rastet sociale në vend. /Telegrafi/