Një prej dasmave më të komentuara të elitës politike amerikane u zhvillua këtë fundjavë në Hamptons, ku u bashkuan në martesë Alex Soros, djali i miliarderit George Soros, dhe Huma Abedin, ish-këshilltarja më e ngushtë e Hillary Clinton.
Ceremonia, që më shumë i ngjante një kurorëzimi mbretëror në botën e politikës amerikane, u mbajt në një nga pronat e familjes Soros në Water Mill, Nju Jork, duke bashkuar në një vend të vetëm pasurinë, ndikimin dhe emrat më të mëdhenj të politikës demokratike dhe kulturës amerikane.
Mes të ftuarve spikatnin Hillary dhe Bill Clinton, ish-nënpresidentja Kamala Harris me bashkëshortin Doug Emhoff, lideri demokrat në Senat Chuck Schumer, ish-kryetarja e Dhomës së Përfaqësuesve Nancy Pelosi, redaktorja e Vogue Anna Wintour, trashëgimtarja Nicky Hilton Rothschild, kryeministri i Shqipërisë Edi Rama, si dhe figura të tjera të njohura të politikës dhe shoqërisë së lartë amerikane.
Atmosferën e dasmës e zbukuroi performanca e grupit legjendar Boyz II Men, ndërsa menuja përfshinte pjata të sofistikuara si agnolotti me tartufe, supë angleze me bizele të ftohta dhe mish Wagyu me karkaleca në zgarë.
Gjatë mbrëmjes, dolli mbajtën emra të njohur si Hillary Clinton, Anna Wintour dhe Edi Rama, i cili qëndron prej vitesh pranë familjes Soros.
Historia e dashurisë mes Soros dhe Abedin ka tërhequr prej kohësh vëmendjen e mediave, jo vetëm për shkak të pozitave të tyre publike, por edhe për të kaluarën e Abedin, e cila në vitin 2016 u nda nga ish-kongresmeni Anthony Weiner, i përfshirë në skandale seksuale.
Fejesa e çiftit u bë publike verën e kaluar, ndërsa planet fillestare për një martesë private ndryshuan pas presionit të miqve të ngushtë, përfshirë Hillary Clinton, për një ceremoni më madhështore.
“Mendoj se ajo e meriton”, ishte shprehur Clinton për Vogue. “Ajo e meriton të ketë një moment të tillë”.
Ceremonia përfshiu edhe elementë të veçantë për të respektuar trashëgiminë fetare të çiftit – me elementë si nga besimi mysliman i Abedin ashtu edhe nga ai hebre i Soros.
Ndërsa në Hamptons festohej, në pjesë të tjera të SHBA-së dhe botës situata ishte shumë më e tensionuar. Protesta kundër Donald Trump zhvilloheshin në disa qytete, një ligjvënës në Minesota u vra në një shpërthim dhune, dhe tensionet midis Izraelit dhe Iranit nxitën frikën për përshkallëzim në Lindjen e Mesme.
Kontrasti ishte i madh me qetësinë luksoze të Hamptons, ku karvanët e SUV-ve të zinj transportonin të ftuarit mes rrugëve të mbushura me lule dhe gjelbërim, duke sjellë një atmosferë që shumë e krahasuan me një ribashkim të epokës Clinton.
Alex Soros në qendër të filantropisë dhe politikës
Alex Soros, 39 vjeç, tashmë ka marrë drejtimin e fondacionit të krijuar nga babai i tij George Soros, i njohur si një nga donatorët më të mëdhenj për kauzat progresive në mbarë botën.
Ai është shprehur hapur për synimin e tij për të qenë “më politikan” se i ati, duke u shfaqur shpesh në takime me figura të rëndësishme demokrate dhe duke ndarë momentet në rrjetet sociale.
Ndërkohë, Huma Abedin, e cila nisi karrierën si praktikante pranë Hillary Clinton në moshën 19-vjeçare, është përpjekur gjithnjë të mbajë një profil më privat. Megjithatë, kjo martesë e vendos tani përfundimisht në qendër të skenës publike si pjesë e një çifti politik të fuqishëm në SHBA.
Në fund të muajit, vëmendja e elitës pritet të zhvendoset në Venecia, ku një tjetër martesë e bujshme do të mbledhë figura të ngjashme: ajo e Jeff Bezos me Lauren Sánchez.
