“Dardanët i dalin zot Kosovës”, kryeministri Kurti ekzaltohet me fitoren ndaj Irlandës

Kryeministri Albin Kurti është gëzuar pas fitores së Përfaqësueses së Kosovës ndaj Irlandës në kuadër të para-kualifikuesve të Kupës së Botës në basketboll.

Kosova e ka nisur me fitore ciklin e ri kualifikues për Kupën e Botës 2027, duke mposhtur Irlandën me rezultatin 83:76.

Te Dardanët më i miri ishte Drilon Hajrizi me 20 pikë, nëntë kërcime e tri asistime. Pas tij me 19 pikë ishte Dardan Berisha, ndërsa Mikaile Tmusic kontribuoi me 11 pikë.

Lexo po ashtu Kosova ruan qetësinë dhe fiton në fund ndaj Irlandës

Në këtë ndeshje i pranishëm ishte edhe kryeministri Kurti, i cili iu ka gëzuar pa masë fitores së Kosovës.

Pas ndeshjes, i pari i Qeverisë tha se “Dardanët i dalin zot Kosovës”.

Postimi pa ndërhyrje i Albin Kurtit

Dardanët i dalin zot Kosovës!

Në palestrën e mbushur përplot të Pallatit të Rinisë dhe Sportit, në çerekun e fundit të lojës të gjithë ishim në këmbë në kërkim të fitores. 83 me 76 ishte rezultati fitues i basketbollistëve tanë ndaj Irlandës.

Këtë të diel, e luajmë ndeshjen e radhës si mysafir kundër Azerbajxhanit.

Duke besuar në sukses, vazhdojmë me hapa të sigurtë në rrugëtimin tonë për parakualifikimet e Kupës së Botës.

/Telegrafi/