Dalin para gjykatës tri infermieret që dyshohen për keqtrajtimin e të moshuarës në Pejë

Ka filluar seanca fillestare në Gjykatën Themelore ndaj tri infermiereve të cilat dyshohen se kanë keqtrajtuar të moshuarën në strehimoren “Orenda”, në Pejë.

Lajmin për Telegrafin e ka konfirmuar zëdhënësja e Gjykatës Themelore në Pejë, Tringa Zhuti.

“Seanca fillestare ka filluar sot në orën 10:00”, ka thënë Zhuti.

Lexo po ashtu Sulmi fizik ndaj të moshuarës në Pejë - caktohet seanca fillestare ndaj tri infermiereve të akuzuara

Ndryshe, Prokuroria Themelore në Pejë katër muaj më parë ka ngritur aktakuzë ndaj tri të pandehurave me inicialet A.P., A.R., dhe R.K., të dyshuara për këtë rast.

Sipas aktakuzës, tri të pandehurat në cilësinë e infermiereve në shtëpinë e kujdesit për të moshuar “Orenda”, me dashje dhe në bashkëkryerje kanë përdorur forcë ndaj të moshuarës, e cila ishte e vendosur në ketë strehimore.

“Në atë mënyrë që pasi të pandehurat planifikojnë ta vënë nën kontroll viktimën e ndjeshme, me kërkesën e të pandehurës A.P., e pandehura R.K., e incizon me telefon, kurse e pandehura A.R., e kap përdore viktimën duke e mbajtur, e pandehura A.P., e godet disa herë me shuplakë viktimën e tri herë me gjunjë në pjesë abdominale,  e të gjitha këto veprime përcjellën me video incizim dhe të qeshura nga tri të pandehurat”, thuhej në njoftimin e prokurorisë. /Telegrafi/