Çfarë tha Mbappe për Ronladon në konferencën e tij të parë si lojtar i Real Madridit

Kylian Mbappe ka thënë se ende nuk është marrë ndonjë vendim nëse do t’i nënshtrohet apo jo një operacioni pas ardhjes së tij në Real Madrid.

Sulmuesi francez theu hundën gjatë ndeshjes së parë të Francës në Euro 2024 më 17 qershor.

Në vend që të bënte një operacion që mund ta kishte përjashtuar atë nga pjesa tjetër e turneut, Mbappe u kthye në fushë tetë ditë më vonë i veshur me një maskë mbrojtëse.

25-vjeçari pranoi se me maskën kishte një ndjesi të pakëndshme dhe se nuk e kishte veshur fare gjatë ndeshjes së fundit të Francës në Euro – humbjen 2-1 nga Spanja në gjysmëfinale.

Me përfundimin e Euro 2024, Mbappe e ktheu fokusin e tij në çështjet e klubit të martën, kur u zbulua zyrtarisht si lojtar i Real Madridit në Bernabeu.

Duke folur në ceremoninë e prezantimit të tij, Mbappe u pyet për hundën e tij.

Ai u përgjigj: “Kam kaluar kontrollin mjekësor këtë mëngjes. Ne do ta shikojmë situatën së bashku dhe do të shohim se çfarë mund të bëjmë për të”.

“Ne ende nuk e kemi marrë vendimin. Tani këto gjëra nuk varen vetëm nga unë, por patjetër do të sigurohem që të jem gati kur skuadra të ketë nevojë për mua”.

“Unë me të vërtetë dua ta luaj atë ndeshjen e parë me fanellën e Real Madridit, por kjo pyetje ndoshta duhet të jetë për trajnerin”, shtoi më tej Mbappe.

Nuk është ende e qartë se kur do të debutojë Mbappe për Madridin. Klubi i tij i ri do të udhëtojë në SHBA për tri ndeshje miqësore – kundër Milanit, Barcelonës dhe Chelseat – në fillim të gushtit.

Ndeshja e parë konkurruese e Madridit për sezonin 2024-25 është planifikuar për 14 gusht kur ata do të përballen me Atalantën në finalen e Superkupës së UEFA-s në Varshavë.

Mbappe do ta fillojë karrierën e tij në Madrid duke mbajtur numrin 9 në shpinë, ashtu siç bëri legjenda e klubit Cristiano Ronaldo në 2009.

Tema e Ronaldos – golashënuesi më i mirë i të gjitha kohërave i Madridit, që ka shënuar 450 gola në 438 ndeshje midis 2009 dhe 2018 – doli gjatë pyetjeve dhe përgjigjeve të së martës.

Ronaldo – i cili tani luan futbollin e klubit të tij për Al Nassr në Arabinë Saudite – ishte pjesë e skuadrës së Portugalisë që u eliminua nga Euro 2024 nga skuadra franceze e Mbappes në fillim të këtij muaji.

Mbappe e ka idhulluar Ronaldon që kur ishte fëmijë dhe francezi tha të martën: “Ai më ka dhënë gjithmonë këshilla, më ka këshilluar që të punoj shumë dhe të tregoj pasionin tim për lojën”.

“Ishte një përvojë e vështirë për të në Eurot e fundit, por ai është një legjendë e madhe dhe unë do të doja t’i dërgoja një përqafim të madh”, shtoi më tej 25-vjeçari. /Telegrafi/