Çështja e pagesës së rrymës në veri, Bislimi sqaron si do të rregullohet: Po mundohemi ta minimizojmë dëmin, jemi viktimë e gabimeve në të kaluarën

Takimet bilaterale në Bruksel gjatë javës që lamë pas kanë zgjatur tri ditë të plota, ku janë diskutuar shumë tema, njëra ndër të cilat edhe pagesa e energjisë elektrikë për serbët e veriut që bëhet thuajse çdo vit nga Qeveria e Kosovës.

Zëvendëskryeministri i Kosovës, Besnik Bislimi që po i prinë ekipit negociator në nivel ekspertësh, ka thënë për Telegrafin se janë në rrugë të mirë për të vënë në binar këtë çështje.

Ai tha se e kanë dorëzuar një propozim të masave konkrete që duhet të merren nga BE-ja për rregullimin e kësaj çështjeje.

“Tek rasti i energjisë, mendoj që jemi në rrugë të mirë që edhe konsumin e energjisë në veri ta vendosim në binarët e sistemit tonë në tërësi. Jemi dakorduar me BE-në që t’ju dorëzojmë atyre një plan konkret me hapat që duhet të ndërmarrim në tre muajt e ardhshëm, kemi bërë këtë që ditën e nesërme. Bisedimet ka qenë më 16 (nëntor), ne më 17 i kemi dorëzuar z. Lajçak një propozim të masave konkrete që nënkuptojmë edhe veprimet që duhet të ndërmarrin nga vet Bashkimi Evropian për akomodimin e pikës 13 që nënkupton obligimet e BE-së dhe mendoj që ky propozim është pritur jashtëzakonisht mirë nga zyra e tij”, tha Bislimi.

Lexo po ashtu Dialogu me Serbinë në Bruksel, Bislimi jep detajet e takimeve dhe flet për progresin në temat e diskutuara

Zëvendëskryeministri Bislimi tha se janë viktimë e gabimeve që janë bërë në të kaluarën, ku sipas tij gabimi i parë është bërë kur është pranuar që çështja e energjisë elektrike në veri të Kosovës të trajtohet si çështje politike.

“Jemi viktimë e disa gabimeve fillestare që janë bërë në të kaluarën. Gabimi i parë është bërë që pagesën e energjisë në veri ta trajtojë si çështje politike. Nuk ka askund në botë ku pagesa e një shërbimi publik trajtohet nga dimensioni politik, është thjeshtë transaksion, ku qytetari merr një shërbim dhe për të njëjtin paguan koston. Por këtu pala serbe ka qenë e suksesshme sepse ka imponuar në tavolinën e bisedimeve një temë të thjeshtë ku është kontratë e qytetarët me komunën”, tha Bislimi.

Ai tha se tash do të merren me minimizim të dëmit dhe licencimin e një operatori tjetër, duke u kujdesur dhe duke mos prekur në distribuim dhe transmision të energjisë.

“Sikur kjo të mos mjaftonte ata kanë draftuar një marrëveshje që ka paqartësi të mëdha brenda dhe konfuzion saqë të krijon përshtypjen që personat e involvuar nuk e kanë ditur në mënyrë bazike si funksionon kjo. Neve na mbetet që të merremi me minimizim të dëmit, brenda kornizave të gjemë zgjidhje. Kjo zgjidhje ka të bëjë me licencimin e një operatori tjetër që bën furnizimin me energji elektrike, duke u kujdesur që në asnjë moment nuk preket uniteti si në transmision, as në distribuim të energjisë”, tha Bislimi, duke shtuar se duhet të përpiqen që qytetarët dhe bizneset të mos diskriminohen. /Telegrafi/