Brigada Azov tani me dronë “Made In Ukraine”, me ta po e kanë më të lehtë gjuetinë ndaj objektivave ruse  

Ukraina ka një dron të ri që i ngjan atij në të cilin Rusia është mbështetur gjatë gjithë luftës.

Ushtarët e saj thonë se fluturakja e ngjashme me Shahedin është e lehtë për t’u përdorur, dhe tashmë u jep atyre një avantazh në goditjen e objektivave ruse të vijën e parë të frontit, transmeton Telegrafi.

Brigada e 12-të e Operacioneve Speciale të Ukrainës, e njohur si Brigada Azov, ndau fotot e armës së saj më të re. Njësia veterane e Ukrainës publikoi një video të dronit duke goditur një kamion rus.

Brigada tha se ky dron i ri, i identifikuar si SETH, lejon operatorët të kryejnë operacione me dron në mënyrë më efikase kundër trupave dhe pajisjeve ruse.

Njësia tha se droni i ri është prodhuar tërësisht në Ukrainë. Fondacioni Come Back Alive ofroi grupin e parë të këtyre dronëve të rinj, të cilët po përdoren në sektorin Toretsk.

Ukraina i ka dhënë shumë prioritet dronëve, duke i parë ata si një mjet të çmuar që do të shpëtojë jetë. Vendi po planifikon të shpenzojë mbi 2.6 miliardë dollarë për rreth 4.5 milionë dronë.

Prodhuesit ukrainas kanë punuar në modele të reja, si dhe softuer dhe teknologji të tjera për t’i rezistuar bllokimit të sinjalit rus dhe luftërave të tjera elektronike.

Një tjetër prioritet janë aftësitë autonome, të cilat do ta bënin më të lehtë gjetjen dhe goditjen e objektivave në mënyrë të saktë dhe efektive.

Kompanitë dhe njësitë ukrainase kanë thënë se zhvilluesit e dronëve po punojnë ngushtë me operatorët se cilat asete nevojiten më shumë në fushëbetejë, dhe se si Ukraina mund të vazhdojë të rrisë prodhimin vendas të dronëve. /Telegrafi/