Breshëri vret një vajzë njëvjeçare, dhjetëra të lënduar – pasi një stuhi e tmerrshme breshëri përfshiu Spanjën

Një vajzë njëvjeçare gjen vdekjen nga breshëri kur një stuhi e tmerrshme përfshiu Spanjën, duke lënë 30 persona të lënduar.

Sipas mediave të huaja, përcjell Telegrafi, vogëlushja ishte një nga 30 personat e lënduar pas goditjeve të drejtpërdrejta nga kokrrat e breshrit në dhe rreth qytetit katalanas La Bisbal de l’Emporda.

Ajo u dërgua me urgjencë në spitalin Josep Trueta në Girona të martën pasdite, por vdiq të mërkurën herët në mëngjes si pasojë e një traume të rëndë në kokë.

Ndërkohë bëhet e ditur se një grua ka mbetur në të njëjtin spital të mërkurën për shkak të plagëve që ka pësuar nga stuhia shkatërruese e breshrit.

Shumica e 28 personave të tjerë që kishin nevojë për trajtim mjekësor thuhet se kanë pësuar lëndime në kokë ose prerje nga akulli që kishin nevojë për qepje, si dhe kocka të thyera.

Shumë makina dhe ndërtesa u dëmtuan gjithashtu nga kokrrat e breshrit të madhësisë së topit të tenisit, me tjegulla të çatisë të copëtuara dhe panele diellore të gërvishtura.

Autoritetet e motit thanë se breshëri që ra në zonë, pranë qytetit turistik të Girona pranë kufirit të Spanjës me Francën, ishte më i madhi në njëzet vjet.

Përmbytja filloi rreth orës 19:30 të së martës dhe vajza 20 muajshe e pësoi goditjen vdekjeprurëse disa minuta më vonë.

Stuhia e breshrit zgjati rreth 15 minuta.

Mediat spanjolle kanë raportuar se zjarrfikësit morën më shumë se 40 thirrje urgjente ‘për shkak të dëmtimeve të ndryshme në ndërtesa dhe instalime elektrike’, si dhe për të mbështetur ‘në ndihmën e të lënduarve’. /Telegrafi/