Brenda bunkerit bërthamor të ndërtuar gjatë viteve të 60-ta nga SHBA-të, atë e kishte vizituar presidenti Kennedy (Foto/Video)

Së fundmi është duke qarkulluar në internet një video e cila tregon në detaje se si duket bunkeri luksoz i “Apokalipsit”, i ndërtuar gjatë viteve të ’60-ta.

Bunkeri i ndërtuar në Kansas të SHBA-ve, dikur ishte edhe “shtëpia” e raketave bërthamore të cilat i kishte në dispozicion për t’i lansuar vetëm presidenti amerikan, transmeton Telegrafi.

I projektuar për t’i bërë ballë erërave që shkaktohen as lansimit të armëve bërthamore me shpejtësi prej 3,200 kilometra në orë, bunkeri gjithashtu i rezistonte edhe sulmit bërthamor.

Videoja e publikuar nga Dan dhe i biri i tij Lincoln, tregon bunkerin luksoz që dikur e kishte vizituar edhe presidenti John F. Kennedy.

Bunkeri nëntokësor luante rol kyç në krizën kubane të raketave bërthamore gjatë vitit 1962, ku për plotë 13 ditë bota jetoi në ankth nga frika se mund të shpërthej lufta mes SHBA-ve dhe Bashkimit Sovjetik.

Ky bunker që njëherit kishte kapacitete t’i lansonte edhe raketat bërthamore të SHBA-ve, kishte kaluar në pronësi të Larry Hall që e shndërroi në apartamente për personat që i kanë xhepat e thellë. 12 njësitë e bunkerit janë duke u shitur nga 1.5 deri në 3 milionë dollarë.

Në video shihen babë e bir se si shëtisin nëpër bunkerë, që në shikim të parë ngjanë shumë me ata të filmave aksion me plotë butona për lansim të raketave.

Bunkeri kishte një sistem të veçantë që i ndalte edhe zogjtë të fluturojnë mbi të. Gjithashtu shihen hartat që tregojnë sallat që i kishte vizituar presidenti Kennedy gjatë inspektimit të punimeve.  /Telegrafi/