Breivik: Trojet shqiptare të pushtuara nga xhihadistët

Ekstremisti norvegjez që mori me gjakftohtësi të plotë jetën e të paktën 85 të rinjve në ishullin norvegjez të Utoyas, pak muaj para aktit që tronditi Norvegjinë dhe botën mbarë kishte publikuar në internet manifestin e tij. I publikuar nga e përditshmja italiane “Corriere de la sera”, manifesti ku mbështetej teoria ekstremiste e Anders Behring Breivik, ka një titull tejet domethënës: Deklarata e Pavarësisë së Evropës.

Brenda këtij manifesti, vrasësi ekstremist kishte paraparë të gjitha aksionet që pritej t’i vinte në jetë njërin pas tjetrit.

Ashtu si teoria shfarosëse e nazizmit ndaj hebrenjve, manifesti i ekstremistit të djathtë norvegjez ka si lajtmotiv çlirimin e Evropës nga kultura islamike dhe sistemi shoqëror multi-kultural marksist.

Në këtë manifest, Breivik flet edhe për shqiptarët, të cilët i cilëson si njerëz të pamëshirshëm dhe të vendosur. Sipas tij shqiptarët drejtojnë botën e nëndheshme në Evropë. Ekstremisti i renditë shqiptarët, e në veçanti kosovarët, si pjesë të xhihadit islamik global, që ka si lajtmotiv islamizimin e popujve të Evropës.

Trojet shqiptare, sipas Breivik, janë të pushtuara nga xhihadistët. “Në planet e dëbimit të pastrimit të Evropës nga islamikët, trojet shqiptare do të jenë një zonë e rëndësishme transiti për një numër të madh të të larguarve”, ka shkruar ai.

Madje, shfrenimi i ekstremistit shkon deri aty sa kërcënon shkatërrimin e Aleancës së Atlantikut të Veriut, të cilën e cilëson instrument për islamizimin e Evropës.

Ai kërkon krijimin e një aleance të re, si ajo e ushtrive të kryqëzatave, ku të përfshihet edhe Rusia. Manifesti me simbole të lashta të besimeve kelte, dhe me referenca mbi historinë e kalorësve templarë, është firmosur nga Andrew Breivik, pikërisht në versionin anglo-sakson të emrit të tij. /Zëri/Telegrafi/