Blair: Lufta kundër ekstremizmit islamik, është luftë për të gjithë ne

Ish-kryeministri britanik, Tony Blair ka kërkuar veprime urgjente dhe të plota kundër ekstremizmit islamik, i cili siç tha ai duhet të jetë një unitet thelbësor i myslimanëve dhe jomyslimanëve, ndërsa kërkon krijimin e një besëlidhje të re brenda islamit dhe jashtë islamit.

“Shumica dërrmuese e njerëzve në mbarë botën besojnë se kjo është një luftë që definon brezin tonë. Bota kërkon një përgjigje të plotë dhe koha për veprim është tani”, ka thënë Blair për “CNN”, transmeton KosovaPress.

Organizatat terroriste, si i ashtuquajturi Shteti Islamik dhe Al-Kaeda, janë manifestimi më rrezikshëm kundër çdo norme dhe vlere universale dhe sipas tij, këto grupe që udhëhiqen nga ideologji fetaro-politike dhe të besimeve në xhihadin e dhunshëm, lejojnë kthimin e Islamit në shekullin e shtatë, ku justifikohet dhuna kundër tjetrit, “kështu që nuk është çudi që ata më së shumti të vrasin myslimanët e tjerë”, ka vlerësuar Blair.

Ish kryeministri thotë se ambicia e tyre është shkatërrimi i plotë i njerëzimit, institucioneve dhe qeverive që nuk pajtohen me ta dhe fusha e betejës nuk është vetëm Lindja e Mesme dhe Afrika Sahariane, por një luftë afatgjate për zemrat dhe mendjet e të gjithëve.

Blair thotë se ka nevojë për një besëlidhje të re, brenda islamit dhe jashtë islamit, i cili do të çojë lëvizjen kundër ekstremizmit, sepse “kjo është një luftë për të gjithë ne, duke përfshirë edhe liderët politikë”./Telegrafi/