Nëse po rregulloni oborrin e shtëpisë së re, kini kujdes: disa bimë nuk duhet t’i mbillni pranë banesës, pasi mund të shkaktojnë më shumë dëm sesa dobi
Një oborr i mirëmbajtur është një nga pasuritë më të mëdha të çdo shtëpie, por gjatë planifikimit të gjelbërimit, shumëkush harron një rregull të rëndësishëm: jo të gjitha bimët janë fqinjë të mirë – të paktën jo për shtëpinë tuaj. Disa prej tyre, megjithëse duken dekorative dhe të dobishme, mund të sjellin pasoja serioze me kalimin e kohës, sidomos nëse mbillen shumë afër themeleve, fasadës apo rrjeteve të instalimeve.
Rrënjët që përhapen dhe ngrenë trotuaret, bimët që tërheqin insekte të padëshiruara, ose ato që rrisin rrezikun e lagështisë, mykut dhe dëmtimit të strukturës, janë disa nga arsyet për të qenë të kujdesshëm.
Ekspertët të mirëmbajtjes së kopshteve paralajmërojnë: studioni me kujdes sjelljen dhe karakteristikat e bimës përpara se ta mbillni pranë shtëpisë.
Më poshtë gjeni një listë me bimë që, sado të bukura të jenë, nuk janë zgjedhja më e mirë për t’u mbjellë pranë themeleve të një shtëpie, transmeton Telegrafi.
“Jo të gjitha bimët janë të përshtatshme për çdo oborr,” thotë Rafi Fridmen, president i Coastal Luxury Outdoors, për HouseBeautiful.com. “Disa përhapen në mënyrë agresive, nuk përshtaten me çdo klimë, mund të paraqesin rrezik për shëndetin e fëmijëve apo kafshëve shtëpiake, ose kërkojnë mirëmbajtje të lodhshme.”
Blerja e një shtëpie me bimësi pushtuese mund t’ju kushtojë shumë. “Një pemë pushtuese mund të kërkojë prerje të përsëritura dhe madje edhe trajtime me pesticide. Kostoja mund të arrijë lehtësisht në qindra, madje mijëra dollarë,” thotë Tom Smit, pronar i Desert Designer Landscape and Development në Arizona. “Rrënjët e tyre mund të ngrenë trotuaret, të dëmtojnë muret apo të depërtojnë në themelet e shtëpisë. Dëmi mund të shkojë në dhjetëra mijëra dollarë dhe të rrezikojë vetë strukturën e banesës.”
Për t’ju ndihmuar të shmangni këto probleme, po ndajmë këshilla nga ekspertë të hortikulturës dhe pasurive të paluajtshme për bimët që duhet t’i shmangni pranë shtëpisë.
Kudzu
Një nga bimët që çdo blerës duhet ta vëzhgojë me kujdes është kudzu. “Është bari më pushtues në planet,” thotë Temi Sons, themeluese dhe drejtoreshë e TN Nursery në Tennessee. “Mund të rritet deri në 45 cm në ditë. Heqja e saj kërkon ndërhyrje profesionale – edhe për pronarët me përvojë është një sfidë e madhe.”
Bambuja
Edhe pse duket bukur dhe mbulon boshllëqet e oborrit, bambuja është jashtëzakonisht pushtuese. “Përhapet në mënyrë agresive dhe mund të dëmtojë si mjedisin, ashtu edhe strukturat,” thotë Bret Douglas nga Ironclad Landscape Management. Ai sugjeron mbjelljen e bambusë në tufa të izoluara, që kontrollohen më lehtë, ose përdorimin e alternativave si jasemini yll apo mandevilla.
Oborrtari japonez
Kjo bimë jo vetëm që mund të shkatërrojë një oborr të tërë, por është edhe shumë e vështirë për t’u zhdukur. “E tejkalon çdo bimë tjetër dhe është tepër e qëndrueshme,” thotë Matt Slaymaker nga Lively Root. Rizomat e saj nëntokësore mbeten aktive edhe pas krasitjes, duke kërkuar trajtim të përsëritur – shpesh shumë herë.
Bari i Bermudeve
I përhapur në rajonet e ngrohta, ky bari është shumë pushtues. “Ka nevojë për kositje të rregullt dhe ndarje të qarta, përndryshe përhapet në gjithë hapësirën,” thotë Scott Sergeant, pronar i Sergeant Landscape & Arboriculture. Heqja kërkon përdorimin e herbicideve sistemike.
Menta
Shije e mirë dhe aromë e këndshme, por vetëm nëse mbahet në enë. “Jashtëzakonisht agresive. Nëse e lini të lirë në oborr, përhapet shpejt dhe mbyt bimët e tjera,” paralajmëron Fridmen. /Telegrafi/
