Bernard Berisha flet pas golit

Bernard Berisha ka shënuar golin e parë sot me Anzhin në kampionatin rus, në një ndeshje ku skuadra e tij u mund me rezultatin 4-2 nga Ural.

Pas ndeshjes, Berisha ka dhënë një intervistë të shkurtër sportal.al ku flet për golin e shënuar, kampionatin rus dhe Kosovën.

Bernard, ndeshja e parë në formacion me Anzhin dhe arritët të shënoni. Si ndiheni?

Jam shumë i lumtur për golin por jam pakëz i mërzitur që nuk arritëm të dalim me një rezultat pozitiv në këtë ndeshje. Por kështu është shkruar. Personalisht po kaloj një formë shumë të mirë dhe për këtë falënderoj Zotin.

Cilat janë përshtypjet e krijuara për kampionatin rus pasi keni provuar të luani në dy ndeshjet e para?

Në ndeshjen e parë kam qenë me temperaturë dhe në momentet e fundit doktori ka vendosur që të luaj në pjesën e dytë. Është një kampionat shumë i fortë fizikisht dhe një kampionat shumë interesant, shumë për t’u vlerësuar.

Dy humbje radhazi dhe pozitat e Anzhit nuk janë aspak të mira. Ju shqetëson kjo?

Sigurisht që më shqetëson por unë do të mundohem në çdo ndeshje të jap më të mirën për klubin për të arritur synimet që kemi. Unë jam shumë i lumtur që jam pjesë e Anzhit.

Ndeshja e parë në shtëpi, ndërsa këtë herë në transfertë, aty ku statistikat flasin për Anzhin që ka marrë 11 pikë…

Po të them të drejtën, sot u paraqitëm më mirë se në ndeshjen e parë me Amkar, edhe pse humbëm. Kishim në dorë çdo gjë por fati nuk ishte me ne. Shpresojmë të arrijmë sa më shpejt te fitoret.

Lëmë Anzhin dhe rikthehemi në vendlindje. Kosova pritet të luajë në shtator ndeshjet e para zyrtare. Do prisni Kosovën, apo do pranonit një ftesë të Shqipërisë nëse do t’iu vinte?

Shpresoj shumë që të pranohet Kosova dhe lutem që të pranohet. Sa i përket Shqipërisë nuk kam asnjë koment në lidhje me ketë pyetje.