Berisha: Deliq xhelati i shqiptarëve të Kosovës, Vuçiq po e sfidon qytetërimin perëndimor

Ish-kryeministri i Shqipërisë, Sali Berisha e ka konsideruar si një provokim të rëndë ndaj shqiptarëve të Kosovës dhe viktimave të gjenocidit serb në përgjithësi, zgjedhjen e Bozhidar Deliq si nënkryetar të Kuvendit të Serbisë.

Berisha në një reagim është shprehur se Deliq është xhelati i shqiptarëve të Kosovës, ndërsa Aleksandar Vuçiq po e sfidon qytetërimin perëndimor.

“Në një sfidë të hapur ndaj shqiptarëve dhe komunitetit ndërkombëtar, Aleksandër Vuçiq zgjodhi me votat e partisë së tij, Deliq si nënkryetar të parlamentit të Serbisë. Bozhidar Deliq është një xhelat i vërtet i shqiptarëve në Kosovë”, shkruan Berisha në Facebook.

Deliq ishte komandant i brigadës famëzeze së 549 të ushtrisë serbe e cila në Gjakovë, Prizren dhe Rahovec sipas veprimtares së njohur të të drejtave të njeriut, Sonja Biserko ka vrarë mbi 2,174 civilë. prej tyre mbi 450 janë gjetur në varreza masive në Serbi.

Lexo po ashtu Bozhidar Deliq që ishte komandant i brigadës që kreu krime lufte në Kosovë, zgjidhet nënkryetar i Parlamentit të Serbisë

“Dënoj me ashpërsinë më të madhe këtë vendim të Putinit të vogël dhe padronit të Edi Ramës, si një provokacion të rëndë ndaj viktimave të gjenocidit serb, por dhe mbarë botës së qytetëruar. Me këtë akt të hapur armiqësor ndaj kombit shqiptar, por edhe komunitetit ndërkombëtar, duke shpërblyer xhelatët e masakrave dhe gjenocidit serb, presidenti i Serbomadhisë Aleksandër Vuçiq dëshmon se ka mbetur siç ka qenë, Geobels i Sllobodan Millosheviçit ideator dhe mbështetës i krimeve monstruoze të serbëve ndaj shqiptarëve dhe boshnjakëve”, ka përfunduar ai. /Telegrafi/