Bëhet hapja solemne e sallës së teatrit në Mitrovicë, fillon edicioni i 14-të i festivalit tradicional të komedisë “Mittrix Fest”

Të hënën përpos Qendrës së Kulturës “Rexhep Mitrovica”, ka qenë hapja solemne edhe e sallës së teatrit “Muharrem Qena” në Mitrovicë.

Hapja solemne e sallës së teatrit u mirëprit sidomos nga trupa e aktorëve rezidentë të këtij teatri.

E në hapjen solemne ka filluar edhe edicioni i 14-të i festivalit tradicional të komedisë “Mittrix Fest”, shkruan Telegrafi.

Në këtë rast, aktori Fehmi Ferati u shpreh se teatri është vendi i emocionit dhe i gjithë piramidës kulturore.

“Kënaqësia është e madhe kur sheh teatër plot, ne qe kemi përjetuar vite me dy-tre rreshta publik të teatrit e kur mbushet plot, na mbushet zemra”, ka thënë Ferati.

Ferati ka thënë se shfaqjen e parë në skenën e këtij teatri e ka luajtur në vitin 1989 dhe prej atëherë situata në Mitrovicë ka qenë e tensionuar, por që brenda në teatër gjithëherë “e kanë gjetur qetësinë”.

“Andaj urojmë që një ditë kur ne jemi këtu brenda, të ketë paqe jashtë”, u shpreh ai.

Ndërsa për fillimin e festivalit “Mittrix Fest”, aktori ka shtuar se do të kënaqemi duke qeshur së bashku, derisa e ktheu situatën pak në humor duke thënë se është edicioni i parë dhe i vetëm që mbahet pa ujë.

“Për gjashtë ditë do të përcjellim shfaqje”, ka treguar ai.

Mbrëmë, në kuadër të këtij festivali u luajt shfaqja e teatrit të Mitrovicës “Një vrasje e vogël aksidentale”.

Sonte do të luhet shfaqja e teatrit shqiptar të Shkupit, “ADN”.

Më 04 dhjetor do të luhet shfaqja e teatrit AAB “Faruk Begolli”, “Qeni i Baskërvilëve”. Më 05 dhjetor do të jetë shfaqja e teatrit të Gjilanit, “Togeri nga Inishmori”. Më 06 dhjetor do të jetë shfaqja e teatrit “Petro Marko” në Vlorë, “Natën e mirë me burrin tim” dhe në natën përmbyllëse të festivalit do të jetë shfaqja “Ping-pong dhe dashuri” nga teatri “Bekim Fehmiu” në Prizren.

Të gjitha këto shfaqje do të luhen në orën 19:00. /Telegrafi/