Duket thjeshtë nga jasht, por brenda gjendet një hapësirë komode, me gjithçka që nevojitet.
Të blerit e një furgoni për kamping dhe nisja për në aventurë, është një gjë shumë e mirë, transmeton Telegrafi. Madje, të gjithë janë paksa xhelozë për ata, që kanë mundësi të kenë një makinë të tillë dhe të përjetojnë eksperienca sa më shpesh që munden.
Ndërtimi i një shtëpie në rrota, është një tjetër aventurë, të cilën e demonstron kjo video nga Exploring Alternatives në YouTube.
Deri më tani, kemi parë shumë furgonë që janë përshtatur sa më mirë, mirëpo ky rast dallon prej tjerave, pasi është bërë zgjidhje e thjeshtë, për një pako shumë komplete.
Mat dhe Danielle janë bashkëshortët që kryen punimet, për shndërrimin e këtij Ford Transit të prodhuar më 2015. Kur themi kryen punime, bëhet fjalë për të gjitha angazhimet e mundshme prej asgjëje, në kthimin e një hapësire, ku gjithçka që nevojitet ndodhet aty.
Përfshirë krijimin e një kuzhine me një lavaman funksional, një banjë, një shtrat që mund të shndërrohet në divan dhe hapësirë për ngrënie, si dhe kutitë e shumta që gjinden në të gjithë furgonin.
Bidonët që zënë deri në 45 litra ujë të freskët, mund të nxirren edhe nga pjesa e jashtme, apo të mbushen nëpërmjet një gypi, pa pasur nevojë të lëvizen. Derisa shtrati mund të lëvizet në disa pozicione në ndryshme, për të krijuar ambientet e dëshiruara, vetëm nëpërmjet litarëve.
Në tavan është i vendosur paneli për mbledhjen e energjisë diellore, si dhe një ventilator për hyrjen e ajrit të freskët, këto janë ndër të vetmet teknologji të larta, që i shohim në këtë furgon.
Gjithçka është bërë me nivel të ulët teknologjie, por në formën më të mirë të mundshme, sepse punimet më shumë janë përqendruar në akomodimin e hapësirës për qëndrimin dhe sigurimin e pajisjeve elementare për jetesë.
Shëtitja dhe pushimi me këtë furgon, si dhe përjetimi që ofrohet gjatë lëvizjes, janë qëllimet për të cilat u ndërtua ky furgon atraktiv. /Telegrafi/
