Avokati Jashari: Rasti i Liridona Murselit më shumë ka karakteristikat e një vrasjeje të planifikuar sesa grabitjes

Mbrëmjen e së mërkurës ndodhi një rast tragjik. Në rrethana ende të paqarta, u vra gruaja e Naim Murselit, këshilltarit të ish-presidentit të Kosovës, Behgjet Pacollit.

Familja Murseli dyshohet se u përballën fillimisht me disa grabitës, të cilët ua morën gjësendet me vlerë dhe më pas shtënë me armë, duke lënë të vdekur Liridona Murselin, 33-vjeçare.

Avokati Arbër Jashari, përmes një reagimi në llogarinë e tij në Facebook, ka thënë se”vrasja më shumë ka karakteristikat e një vrasje të planifikuar se sa grabitje”.

Kjo pasi sipas tij, grabitësit nuk grabitin vetura private, sepse nuk rrezikon për pak.

“Grabitësit zakonisht kanë target bankat, veturat që bartin para, bizneset qe kanë shumë qarkullim( marketet, pikat e karburanti etj.), vendet që kanë gjera me vlerë (ari psh).

“Grabitësi e di, që sot njerëzit nuk mbajnë shumë para me vete, e as shumë stoli ose gjëra tjera të çmuara. Është zor e besueshme qe grabitësit marrin telefona”.

“Grabitësi nuk ka qellim vrasjen. Ai qellim primar e ka  të ushtroj frikë në mënyrë qe ta marr plaçkën. Grabitësi vret veç kur i rrezikohet jeta ose zbulimi i identitetit”, u shpreh Jashari.

Ai konsideron se është pak e besueshme qe grabitësit të jenë ndjerë të rrezikuar, e sidomos nga një grua.

“Uroj qe ky rast te zbardhet shpejtë”, shkroi ai.

Ndërkaq, sipas njoftimeve zyrtare, policia në koordinim me prokurorinë, kanë nisur hetim dhe ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rastit./Telegrafi/