Avokati i Popullit ende s’ka vendosur rreth Ligjit për Paga, pranon edhe tri ankesa

Edhe pse Avokati i Popullit deri më sot janë dërguar 33 ankesa nga subjekte të ndryshme për kundërshtimin e Ligjit të Pagave për sektorin publik, ky institucion ende nuk ka marrë vendim përfundimtar për ta dërguar këtë ligj në Kushtetuese.

Ligji për Paga ka hyrë në fuqi nga data 1 dhjetor, por Avokati i Popullit, Hilmi Jashari thotë për KosovaPress se ende janë në shqyrtim të ankesave të reja, të cilat kanë mbërri sot në Institucionin e Avokatit të Popullit.

Jashari ka bërë të ditur se vetëm sot kanë pranuar tri ankesa të reja, që gjithsej janë 33, teksa tha se janë edhe në shqyrtim të analizës, për të cilën iu nevojitet ende kohë.

“Shumë shpejt do të dalim me një qëndrim zyrtar, mirëpo ende nuk ka përfunduar komplet analiza për të dhënë një përgjigje definitive dhe përfundimtare. Kështu që duhet ende kohë për të pasur një vlerësim përfundimtar. Edhe sot gjatë ditës kemi pranuar tri ankesa të reja. Fillimisht kemi filluar me dy-tri ankesa. Tash numri total është 33. Jemi në fazën e shqyrtimit edhe të analizës, kështu që na merr pak kohë edhe kjo punë”, tha Jashari.

Lexo po ashtu Pagat e sektorit publik që nga dhjetori me rritje – të dhëna që tregojnë se kush janë disa nga përfituesit

Avokati i Popullit aktualisht është duke i trajtuar ankesat e paraqitura nga subjekte të ndryshme të sektorit publik lidhur me Ligjin për Pagat në Sektorin Publik, i cili ka hyrë në fuqi më 1 dhjetor 2019.

Ankesat kryesisht kanë të bëjnë me kushtetutshmërinë e Ligjit në kuptimin e ndarjes së pushteteve dhe barazisë para ligjit, nën pretendimin se Ligji nuk e ka arritur qëllimin e proklamuar me rastin e miratimit të tij, “Pagë të barabartë për punë të barabartë.”

Ditë më parë, Avokati i Popullit, me kërkesën e tij, është takuar me Sindikatën e Arsimit, Sindikatën e Shëndetësisë dhe Sindikatën e Policisë lidhur me Ligjin për Pagat në Sektorin Publik.

Këto sindikata kanë shprehur shqetësimin e tyre lidhur me mundësinë e dërgimit të këtij Ligji në Gjykatën Kushtetuese nga Avokati i Popullit. Për më shumë, këto sindikata, nëpërmes mediave, janë shprehur se ky Ligj nuk guxon të dërgohet në Kushtetuese, duke kërcënuar edhe me “kolaps të shtetit”. /KP/