Austria mbështet Kosovën në luftën kundër korrupsionit

Zëvendësministrja e Punëve të Brendshme e Austrisë, Karoline Edtstadler, ka konfirmuar mbështetjen e shtetit të saj për Kosovën në luftimin e korrupsionit, rezultatet e të cilave do të kenë efekt pozitiv në liberalizimin e vizave dhe përafrimin e Kosovës në rrugën drejt BE-së.

Ajo këto komente i bëri sot gjatë një takimi me drejtorin e Agjencisë Kundër Korrupsionit, Shaip Havolli, ku mori pjesë edhe ambasadori i Austrisë në Prishtinë, Gernot Pfandler dhe një delegacion austriak.

Edtstadler së bashku me ambasadorin Pfandler ka garantuar Havollin për mbështetjen Agjencisë në luftimin e korrupsionit dhe ka shprehur gatishmërinë për thellimin e bashkëpunimit për aktivitetet që kanë për qëllim zbatimin efikas të politikave kundër korrupsionit.

Ndërsa, Havolli e njoftoi Edtstadler për mandatin dhe kompetencat e Agjencisë Kundër Korrupsionit, për punën e deritanishme të këtij institucioni, për ndryshimet legjislative të cilat janë duke u bërë, si dhe për punën që ky institucion bënë në parandalimin dhe luftimin e korrupsionit në Kosovë.

Në takim u bisedua edhe për sfidat dhe proceset integruese që po kalon Kosova, fuqizimit të mëtejmë të rolit të Agjencisë Kundër Korrupsionit në luftimin e korrupsionit dhe mënyrat e gjetjes së aktiviteteve dhe projekteve të përbashkëta në vetëdijesimin e pasojave të korrupsionit.