Astronauti i NASA-s, Mark Vande Hei, kthehet në Tokë pas një misioni rekord prej 355 ditësh në hapësirë

Astronauti i NASA-s, Mark Vande Hei, ka thënë se mezi priste të shihte gruan e tij pas rikthimit në Tokë pas një misioni hapësinor rekord prej 355 ditësh.

Sipas mediave të huaja, përcjell Telegrafi, herët në mëngjesin e 30 marsit, Vande Hei zbarkoi i sigurt në një kapsulë ruse Soyuz në kullotat e Kazakistanit së bashku me kolegët e tij rusë Anton Shkaplerov dhe Pyotr Dubrov.

Treshja dukej se kishte mbërritur me shëndet të mirë dhe, pas një rekordi prej 355 ditësh në hapësirë, Vande Hei më në fund do të shohë sërish personalisht gruan dhe familjen e tij, diçka për të cilën ai ndau emocionet e tij pak para se të largohej nga stacioni hapësinor.

Fantastic place, occupied by amazing people, working for all of humanity. I’ll forever cherish the memories of serving on the International Space Station. Now, though, I’m thrilled to be back on Mother Earth! pic.twitter.com/pv0V2DqkXZ

— Mark T. Vande Hei (@Astro_Sabot) March 30, 2022

Por udhëtari i hapësirës pranoi gjithashtu se kthimi në Tokë ishte “i hidhur” pasi shënoi fundin e karrierës së tij aktive të astronautit.

“Jam i sigurt se do të kem shumë emocione kontradiktore”, tha ai përpara fluturimit për në Tokë. “I premtova gruas sime se nuk do të fluturoj më në hapësirë, kështu që do të jetë e hidhur”, tha ai.

Ai shtoi se megjithatë është shumë mirënjohës që pati këtë mundësi të mrekullueshme “për të ardhur në stacionin hapësinor këtu me njerëz kaq të mrekullueshëm që i konsideroj miq për pjesën tjetër të jetës sime; për t’i shërbyer vendit tim dhe mbarë njerëzimit”.

Pas mbërritjes së ekuipazhit në Kazakistan, ata u transportuan në një tendë mjekësore dhe më pas u dërguan me helikopter në Karaganda.

Nga atje, Vande Hei ishte vendosur të fluturonte në Hjuston, Teksas, me një aeroplan të NASA-s.

Pas kthimit në shtëpi, ai ka të ngjarë të vazhdojë të rikuperohet nga 355 ditët e tij të njëpasnjëshme në hapësirë, fluturimi më i gjatë i vetëm hapësinor i bërë ndonjëherë nga një astronaut amerikan.

Ndryshe, rekordi – prej 340 ditësh – mbahej nga astronauti i NASA-s, Scott Kelly.

Para kthimit të Vande Hei në Tokë, kishte spekulime se, duke parë se SHBA-të kanë dënuar veprimet e Rusisë për agresionin në Ukrainë, Vande Hei mund të mos fluturojë në shtëpi me një kapsulë Soyuz me kozmonautë.

Megjithatë, është parë se rikthimi i planifikuar i Vande Heit, i pandryshuar, ka shkuar i sigurt dhe me sukses. /Telegrafi/