Arti Venecian i mjeshtrit Guerrino Lovato, shkon në Tiranë

Nën kujdesin e Muzeut Historik Kombëtar, artistit Vladimir Myrtezai Grosha, kuratores Migena Hajdari nga galeria Blu Art Itali dhe Institutit Italian të Kulturës, më 14 maj 2018, në ora 11.00, organizohet një takim me mjeshtrin italian Guerrino Lovato.

Guerrino Lovato është diplomuar në Akademinë e Arteve të Bukura të Venecias. Që prej vitit 1983 ka studion e tij, ku përveç maskave të famshme veneciane, ideon dhe krijon instrumente dhe makineri për teatrin, operën e kinemanë. Në këtë drejtim ai ka bashkëpunuar me regjisorë të famshëm, si Stanley Kubrick (për filmin “Eyes wide shut”) dhe Paolo Sorrentino.

Disa nga veprat e tij më të njohura janë: Projekti Presepe di Vennezia për Komunën e Parisit në Paris, tema e njohur që evokon lindjen e Krishtit; është autor i librit “Objekte dhe skulptura në kartapestë”. Ka bërë disa skulptura për Parkun Guliver në Tokio. Ka organizuar kurse për maskat në disa shtete, si Itali, Gjermani, Francë, Siri, Amerikë, Brazil, Rusi etj. Një ndër skulpturat e tij të njohura është një statujë e Jezusit në stilin e Mikelanxhelos, gjashtë metër e lartë, me kërkesë të Vatikanit.

Për të gjithë të interesuarit aktiviteti do të mbahet tek salla UNESCO.