Apeli konfirmoi dënimin me burgim të përjetshëm për Dardan Krivaçën, Rrjeti i Grave mirëpret vendimin

Rrjeti i Grave të Kosovës ka mirëpritur vendimin e Gjykatës së Apelit, e cila ka vërtetuar aktgjykimin e shkallës së parë duke dënuar Dardan Krivaqën me burgim të përjetshëm për vrasjen e Marigona Osmanit dhe duke konfirmuar dënimin prej 15 vitesh për Arbër Sejdiun për ndihmë në këtë krim.

RrGK thekson se ky vendim është një hap i rëndësishëm drejt drejtësisë për gratë dhe vajzat në Kosovë, duke dëshmuar se dhuna dhe vrasjet me bazë gjinore nuk do të kalojnë pa ndëshkim.

Lexo po ashtu Gjykata e Apelit vërteton dënimin me burgim të përjetshëm për Dardan Krivaçën

“Në një shoqëri ku gratë ende përballen me pasiguri dhe padrejtësi, sistemi i drejtësisë ka një rol kyç në garantimin e mbrojtjes dhe ndëshkimin e autorëve të dhunës”, thuhet në reagim.

Ndryshe, Gjykata e Apelit ka vërtetuar dënimin me burgim të përjetshëm për Dardan Krivaçën, i cili akuzohet se ka vrarë Marigona Osmanin.

Në njoftim bëhet e ditur se Gjykata e Apelit e Kosovës, i ka refuzuar si të pabazuara ankesat e Prokurorisë Themelore në Ferizaj, të përfaqësuesit të të dëmtuarve M.O. dhe V.O. dhe të mbrojtësve të të akuzuarve D.K. dhe A.S., duke e vërtetuar aktgjykimin e Gjykatës Themelore në Ferizaj-Departamenti për Krime të Rënda. /Telegrafi/