Ankohen ferizajasit: U dëmtuam nga vendimi i Qeverisë

Ditë më parë Qeveria e re e Kosovës mori vendim për anulimin e kontratës me Bechtel Enka, çka bëri që t’i pamundësohet kyçja në autostradë qytetit të Ferizajt.  E këta të fundit po e kundërshtojnë këtë vendim.

Ishte paraparë të vazhdoj rruga që do t’i mundësonte qytetit të Ferizajt kyçjen në Autostradën Arbën Xhaferi.

Por Qeveria e re, e pamundësoi një gjë të tillë, kjo sepse ajo mori vendim të anulohet kontrata  me vlerë 50 milion euro me Bechtel Enka-n, nënshkruar nga para ardhësit e tyre.

E në Ferizaj po kundërshtohet ky vendim. I pari i kësaj komune ka kërkuar nga Qeveria rishqyrtim të vendimit, i cili sipas tij është jetik për ekonomin e këtij vendi.

“Është një vendim i kundërshtueshëm për faktin se kundërshtues janë qytetarët e komunës që unë udhëheq. Edhe komuniteti i biznesit e kundërshton atë vendim pasi kanë kërkuar vazhdimisht kyçjen në autostradë”, deklaroi Agim Aliu.

E më të dëmtuarit nga e gjithë kjo situate po del të jenë bizneset që operojnë në këtë qytet.

“Është venim i dëmshëm. Po shpresoj se është vetëm një anulim i përkohshëm”, deklaroi biznesmeni Ibrahim Shehu.

“Për bizneset koha është shumë e çmuar. Kështu që nëse do të ishte kyçje do të kursente në kohë”, deklaroi biznesmeni tjetër, Sadik Krasniqi.

“Anulimi i bën dëm bizneseve të Ferizajt duke pasur parasysh që Komuna e Ferizajt është komuna e dytë që më së shumti i kontribuon buxhetit të shtetit”, deklaroi Ibrahim Hyseni.

Ndryshe në tri qeverisjet e fundit ka pasur tri vendime të ndryshe për këtë çështje. Dy të parat ajo e udhëhequr nga  Isa Mustafa dhe tjetra nga Ramush Haradinaj, morën vendim pro kyçjes së qyteti të Ferizajt dhe Vitisë në autostradën Arbën Xhaferi, ndërsa Qeveri e udhëhequr nga Albin Kurti e ka anuluar atë.

RTV Dukagjini ka tentuar të marrë një prononcim edhe nga Ministria e  Infrastrukturës por kontakti me ta ka qenë i pamundur./RTV Dukagjini/Telegrafi/