Anijet luftarake të SHBA-së dhe Kanadasë lundrojnë nëpër ngushticën e Tajvanit

Një anije luftarake e SHBA-së dhe një e Kanadasë kanë lundruar së bashku nëpër ngushticën e Tajvanit, më pak se një javë pasi Kina zhvilloi një raund të ri lojërash luftarake rreth ishullit.

Bëhet e ditur se Marina amerikane, e shoqëruar herë pas here nga anije nga vendet aleate, kalon nga ngushtica rreth një herë në muaj.

Kina, e cila e pretendon Tajvanin si territorin e saj, thotë se rruga strategjike ujore i përket shtetit kinez.

Siç raporton Flota e 7-të e Marinës së SHBA-së, USS Higgins dhe fregata kanadeze HMCS Vancouver kanë lundruar nëpër ujërat ku liria e lundrimit dhe fluturimit në det të hapur zbatohet në përputhje me ligjin ndërkombëtar.

Lundrimi demonstron përkushtimin e SHBA-së dhe Kanadasë në ruajtjen e lirisë së lundrimit për të gjitha vendet, shkruan Reuters, përcjell Telegrafi.

“Të drejtat dhe liritë lundruese të bashkësisë ndërkombëtare në ngushticën e Tajvanit nuk duhet të kufizohen. SHBA-ja hedh poshtë çdo pohim të sovranitetit ose juridiksionit që është në kundërshtim me liritë e lundrimit, fluturimit dhe përdorime të tjera të ligjshme të detit dhe ajrit”, deklaroi Marina amerikane.

Ndërkohë, Komanda e Teatrit Lindor të Kinës tha se forcat e saj monitoruan dhe paralajmëruan anijet.

“Veprimet e SHBA-së dhe Kanadasë shkaktuan telashe dhe prishin paqen dhe stabilitetin përgjatë ngushticës së Tajvanit”, tha Komanda e Teatrit Lindor kinez.

Ndryshe, Ministria e Mbrojtjes e Tajvanit tha se anijet amerikane dhe kanadeze lundruan në drejtim të veriut dhe forcat e armatosura të Tajvanit i mbanin në vëzhgim, duke shtuar se situata ishtr “normale”.

Marina amerikane dhe kanadeze lundruan për herë të fundit një mision të tillë të përbashkët në nëntor të vitit të kaluar. /Telegrafi/