Ancelotti kishte goditur Ibrahimovicin në kokë te PSG

Trajneri i Bayern Munichut ka treguar historinë e çuditshme me sulmuesin e Manchester United nga koha sa kanë qenë bashkë në Paris.

Mentaliteti fitues nuk është një karakteristikë që mund të studiohet në tavolinë apo që mësohet gjatë kursit të formimit.

Këtë gjë e di më së miri trajneri Carlo Ancelotti, i cili nëpërmjet një mënyre dhe teknike praktike ia ka mësuar këtë gjë një tjetër personazhi shumë të famshëm dhe të uritur për fitore dhe suksese, sikurse është sulmuesi Zlatan Ibrahimovic.

Gjatë një takimi pyetje-përgjigje me tifozët, trajneri i Bayern Munich ka treguar një episod kurioz dhe të çuditshëm të ndodhur me sulmuesin e Manchester United.

Ancelotti dhe Ibrahimovic ishin pjesë e aventurës te PSG. Në kohët e kaluara te Paris Saint-Germain, kompeticionet kombëtare ishin habitati natural, ku mund të strukturohej dhe të programohej e ardhmja europiane e ekipit.

Një incident gjatë rrugës i mundësoi Evian që të mundë parizienët pas ekzekutimit të penalltive në Kupën e Francës, dhe reagimi i trajnerit, i cili në aperencë nuk del kurrë jashtë skemave, ishte i tillë sa për të kthyer përmbys plotësisht dhomat e zhveshjes. Ancelotti tregoi episodin kur ka goditur Ibran në kokë me kuti, teksa sulmuesi nuk reagoi.

“Është një episod gjatë vitit 2013. Më kujtohet se luajtëm vërtetë keq, sikurse flet edhe vetë rezultati, pasi u skualifikuam pas ekzekutimit të penalltive. Gjatë hyrjes në dhomat e zhveshjes, isha shumë i mërzitur dhe i nxehur për shkak të paraqitjes së skuadrës. Mbaj mend se theva një derë. Ajo që e përkeqësoi edhe më shumë klimën ishte goditja nga ana ime e një kutie. Kutia goditi Ibran në kokë, por natyrisht që ishte një goditje e pavullnetshme. Reagimi i tij më çuditi. Nuk shfaqi asnjë shenjë kundërpërgjigje apo mërie ndaj meje. Personalisht mësova shumë nga ai moment. Kur Zlatan është duke humbur qetësinë, ai arrin gjithmonë që ta kuptojë përpara se të ndodhë. Në atë moment ai izolohet, del nga dhoma e zhveshjes, nëse është e nevojshme konsumon edhe ndonjë cigare”, ishe tregimi ekskluziv i Ancelottit.