Ushtruan dhunë ndaj shitësit të një biznesi, arrestohet një person- dy të tjerë vihen në kërkim
Specialistët për Hetimin e Krimeve në Komisariatin e Policisë Numër 6 pas njoftimit të marrë se tre shtetas, në bashkëpunim me njëri-tjetrin, kishin vjedhur me dhunë një shumë parash, në një biznes në vendin e quajtur “Kthesa e Kamzës”, menjëherë kanë organizuar punën për identifikimin dhe kapjen e tyre.
Në kuadër të operacionit policor të koduar “Reaction”, u bë i mundur identifikimi, kapja dhe arrestimi i shtetasit M. A., (33), i cili gjatë operacionit policor për kapjen e tij, në rrugën “Sabaudin Gabrani”, ka kundërshtuar me dhunë punonjësit e policisë, si dhe u shpallën në kërkim shtetasit E. H., 35-vjeç dhe G. L., 34-vjeç, raporton KosovaPress.
Nga veprimet hetimore dyshohet se këta tre shtetas, në bashkëpunim me njëri-tjetrin, i kanë marrë me dhunë 100 mijë lekë të rinj shitësit të një biznesi duke e dhunuar fizikisht.
Vijojnë hetimet për zbardhjen dhe dokumentimin e vjedhjeve të tjera që mund të jenë kryer nga këta shtetas.
Materialet i kaluan Prokurorisë, për veprën penale “Vjedhja me dhunë” e kryer në bashkëpunim.