Real Madridi vazhdon të interesohet për transferimin e Matthijs De Ligt.
Mbrojtësi holandez iu bashkua bardhezinjve në verën e vitit 2019, por viti i tij i parë në Itali nuk ishte edhe aq i mirë.
20-vjeçari pati shumë luhatje në formë, ndërsa nuk po përshtatet mirë me futbollin italian dhe mund të largohet në verë.
Los Blancos mbetën skuadra më e interesuar për holandezin dhe raportet e tyre të mira me menaxherin Mino Raiola mund t’ia lehtësojnë afrimin e De Ligt në Santiago Bernabeu.
Mediat spanjolle raportojnë se Real Madridi është gati ta sakrifikojë brazilianin Marcelo për të arritur te holandezi.
Mbrojtësi i majtë ka humbur vendin e titullarit me ardhjen e Mendy dhe është kërkuar nga Juventus.
Gjithnjë sipas medieve spanjolle, presidenti i klubit Florentino Perez është gati ta dërgojë Marcelon në Juventus për të siguruar shërbimet e De Ligt.
Gjithsesi përveç Marcelos, Reali do të duhej të jepte edhe 40 milionë euro Juventusit për holandezin.
Në garë për qendërmbrojtësin e talentuar mbetet edhe gjiganti anglez Manchester United, që synon të përfshijë në marrëveshje me Pogban. /Telegrafi/