Publikohet raporti vjetor për komunat, rekord në të hyra vetanake - por "notë e dobët" në transparencë

Ministria e Administrimit të Pushtetit Lokal (MAPL) ka publikuar raportin vjetor që analizon performancën e 38 komunave të Republikës së Kosovës për vitin 2025.

Dokumenti shpërfaq një progres të dukshëm në inkasimin e mjeteve financiare, por evidenton sfida serioze në funksionimin demokratik të organeve lokale, veçanërisht në komunat veriore, shkruan Telegrafi.

Kuvendet Komunale: Aktiviteti dhe vendimmarrja

Gjatë vitit 2025, kuvendet e komunave kanë mbajtur gjithsej 430 mbledhje.

Dinamika e punës ndahet në:325 mbledhje të rregullta.43 mbledhje të jashtëzakonshme.55 mbledhje solemne dhe 7 urgjente.

Nga këto takime kanë rezultuar 1,478 akte të miratuara, ku dominojnë vendimet (1,424) përballë rregulloreve (54).

Kamenica shquhet si komuna më aktive me 128 akte, ndërsa në fund të listës renditet Leposaviqi me vetëm 7 akte të miratuara.

Financat: Tejkalimi i planeve dhe sfidat e auditimit

Një nga pikat më të forta të vitit 2025 ishte performanca financiare. Komunat kishin planifikuar 114.2 milionë euro të hyra vetanake, por arritën të mbledhin 121.5 milionë euro (të hyra direkte), duke shënuar një tejkalim prej 6.38%.

Performanca rekord: Komuna e Hanit të Elezit ka shënuar realizimin më të lartë me 388.21% të planit.

Burimet kryesore: Tatimi në pronë mbetet shtylla kryesore me mbi 39.1 milionë euro të inkasuara, ndjekur nga lejet e ndërtimit me rreth 44.5 milionë euro, përcjell Telegrafi.

Ngecjet

Komunat veriore si Zveçani (13.22%) dhe Zubin Potoku (23.04%) kishin nivelin më të ulët të inkasimit.

Përkundër rritjes së të hyrave, Zyra Kombëtare e Auditimit ka gjetur parregullsi në menaxhimin e parasë publike.

Shqetësim mbetet angazhimi i zyrtarëve me "marrëveshje për shërbime të veçanta" (kontrata mbi vepër) pa respektuar procedurat e prokurimit, shpesh për punë që konsiderohen detyra të rregullta të administratës.

Llogaridhënia dhe Transparenca

Në aspektin e llogaridhënies, raporti nxjerr në pah një hendek mes komunave:

Raportimi i kryetarëve: Ndërsa 34 kryetarë kanë raportuar rregullisht para kuvendeve, kryetarët e Zveçanit, Zubin Potokut dhe Leposaviqit nuk kanë raportuar fare gjatë vitit 2025.Takimet me qytetarë: Megjithëse 38 komunat kanë mbajtur formalisht takime publike, 14 komuna kanë dështuar të publikojnë ftesat për këto takime në ueb-faqet e tyre zyrtare.

Siguria

Vetëm 5 komuna (Shtime, Kaçanik, Hani i Elezit, Istog dhe Dragash) kanë përmbushur detyrimin ligjor për mbajtjen e së paku 6 takimeve të Këshillave Komunalë për Siguri në Bashkësi (KKSB).

Barazia Gjinore në Administratë

Raporti tregon një përpjekje për përfshirjen e grave në vendimmarrje. Në 30 komuna janë regjistruar 755 gra në pozita menaxheriale, ndërsa numri total i grave të punësuara në administratën publike lokale (përfshirë kuvendet) arritën në 7,397.

Megjithatë, MAPL thekson nevojën për rritjen e këtij përfaqësimi në përputhje me rekomandimet e BE-së.

Rekomandimet nga MAPL

Për të përmirësuar qeverisjen, MAPL rekomandon që komunat të rrisin kapacitetet profesionale për hartimin e akteve, të funksionalizojnë komitetet konsultative (të cilat deri tani i kanë vetëm 3 komuna) dhe të përmirësojnë raportimin financiar për të evituar gjetjet e përsëritura të auditorit. /Telegrafi/