Paul Pogba ka lënë të kuptohet se e ardhmja e tij qëndron te Manchester Unitedi, ndërsa shpreson të arrijë suksese me Djajtë e Kuq në Ligën e Kampionëve.
Klubi anglez e siguroi pjesëmarrjen në garën më të madhe evropiane duke e mbyllur sezonin në pozitën e tretë në Ligën Premier.
Nga ana tjetër, gjatë sezonit 2019/2020 është spekuluar vazhdimisht se mesfushori francez do të largohet nga Old Traffordi, me Real Madridin dhe Juventusin të interesuar për shërbimet e tij.
Megjithatë, duke qenë se për shkak të krizës së pandemisë globale, klubet e kanë të vështirë të paguajnë shuma të majme parash, interesimi për të është zbehur.
Ndërsa pas sigurimit të një vendi në top-katërshe, 27-vjeçari ka shkruar në rrjetet sociale: “Shkojmë në Ligën e Kampionëve, zemër”, duke lënë të kuptohet se ka plane afatgjate me Unitedin. /Telegrafi/
