PERFORMANCË ARTISTIKE
19/06/2025
Poezi nga: Xhevdet Bajraj
Kur flasim për performancën
një herë kam ndenjur tri ditë e tri net
në një tavernë në Rahovec
Ishte një shfaqje
madhështore
Ditën e katërt
erdhi fantazma e Reksit
qenit që ma vranë para syve të mi
ushtarët e armikut
(së bashku me pranverën)
më lëpiu në faqe
më priu
deri aty ku dikur kishte qenë shtëpia ime
Ky qe art
që ta ndalte frymën e të ngrinte gjakun