Blaise Matuidi ka ndërprerë zyrtarisht kontratën e tij me Juventusin me pëlqim të ndërsjellë mes dy palëve dhe tani pritet të bashkohet me Inter Miami në MLS.
Mesfushori 33-vjeçar ishte bashkuar me Juventusin nga Paris Saint-Germain në verën e vitit 2017 për 25 milionë euro plus bonuse.
Megjithatë, pas tri viteve të suksesshme të kaluara në Allianz Stadium, Matuidi dhe Juventusi kanë vendosur t’i ndajnë rrugët.
Francezi pritet të nënshkruajë me ekipin nga Mayor League Soccer, Inter Miami, i cili është nën pronësinë e legjendës angleze, David Beckham.
“Mesfushori francez largohet nga Juventusi pas tre vjetësh dhe pesë trofeve të fituara në klub”, thuhet fillimisht në njoftimin e Juventusit.
“Pas tre vjetësh dhe pesë titujsh të fituar (tre Scudetto, një Coppa Italia dhe një Superkupë të Italisë), Blaise Matuidi dhe Juventusi ndahen me përfundim konsensual të kontratës së lojtarit”.
“Matuidi ka luajtur 98 ndeshje në Serie A që nga ardhja e tij në Juventus, dhe përveç Paulo Dybala (134), asnjë lojtar nuk ka bërë më shumë paraqitje në të gjitha garat se ai, duke luajtur 133 herë për Bianconeri”, thuhet ndër tjerash. /Telegrafi/