Aktakuzë ndaj një personi në Pejë për veprën penale të dhunimit

Prokuroria Themelore në Pejë, Departamenti për Krime të Rënda, ka ngritur aktakuzë ndaj personit me inicialet E.I., nën dyshimin për kryerjen e veprës penale “Dhunimi”, sipas Kodit Penal të Republikës së Kosovës.

Sipas aktakuzës, ngjarja ka ndodhur më 27 nëntor 2024, rreth orës 19:15, në fshatin Brestovik të Pejës. I pandehuri dyshohet se ka hyrë me forcë në shtëpinë e viktimës dhe më pas, pa dëshirën e saj, ka kryer akt seksual, duke përdorur forcën fizike.

Prokuroria konsideron se veprimet e të pandehurit përmbushin elementet e veprës penale të dhunimit dhe se ekziston dyshim i bazuar mirë për fajësinë e tij.

Prokurori i çështjes i ka propozuar gjykatës që i pandehuri të shpallet fajtor dhe të dënohet sipas ligjit në fuqi për veprën penale që i vihet në barrë./Telegrafi/