Ambasadorja e re e SHBA-ve në Shkup, Kate Marie Byrnes, sot dorëzoi kredencialet deri tek Presidenti i Maqedonisë së Veriut, Stevo Pendarovski, me çka pasuesja e Jess Baily edhe formalisht e fillon punën e saja në vend.

Pendarovski i tha Byrnes se Maqedonia e Veriut vazhdon me integrimin e plotë në strukturat e NATO-s dhe thellimin e bashkëpunimit në të gjitha fushat.

“Në forcimin e demokracisë dhe forcimin e të drejtave të njeriut, ne qëndrojmë së bashku me Shtetet e Bashkuara. Në periudhën e ardhshme, do të vazhdojë mbështetja e parezervë nga Shtetet e Bashkuara. Ju do të gëzoni mbështetjen tonë të plotë, ndihmën dhe miqësinë. Unë jam gjithashtu i hapur për bashkëpunimin në shkencë, arsim, kulturë dhe teknologji”, tha Penderoski para diplomates.

Byrnes në fjalimin e saja tha se SHBA-të në Maqedoninë e Veriut do të angazhohen që të ndërtojnë institucione më të forta dhe luftë kundër korrupsionit./Telegrafi/