Rrjetit të qendrave tregtare të kompanisë “Albi Group” i është shtuar edhe qendra tregtare “Albi Mall” në Gjilan.
Kjo qendër tregtare gjigante u përurua të premten në një ceremoni ku morën pjesë personalitete të shumta nga jeta publike e ndër ta edhe zëvendëskryeministri i Kosovës, Besnik Bislimi.
Me mijëra njerëz e vizitojnë “Albi Mall” çdo ditë në Prishtinë, prandaj edhe moton e kampanjës së fundit e ka "Vendi që jemi mësuar me të".
Ky është një projekt impresionues investiv i cili kap vlerën e 40 milionë eurove, me një hapësirë totale prej 70 mijë metra katrorë, përfshirë edhe "Albi Residencë" në të njëjtën sipërfaqe.
“Albi Mall” në Gjilan ka vlerë të shtuar edhe nga “Albi Residencë”, një kompleks i cili do të ofrojë 175 apartamente për të plotësuar nevojat e qytetarëve për banim.
Objekti përfshinë edhe mbi 1000 vende për parking, dhe do të sigurojë mbi 500 vende të reja të punës.
Përfaqësuesi i "Albi Group", Albi Humolli tha se hapja e "Albi Mall" në Gjilan është një ngjarje e rëndësishme në sferën e biznesit dhe rritjen ekonomike të kësaj komune.
Ndërkaq, zëvendëskryeministri Besnik Bislimi u shpreh se "Albi Mall" është dëshmi për fuqizimin e qytetit të Gjilanit si një qendër e rëndësishme rajonale.
Hapja e "Albi Mall" në Gjilan, i cili do të jetë vendtakimi i përditshëm jo vetëm për banorët vendas, por nga e gjithë Kosova, është përcjellë me aktivitete dhe prezantim të brendeve si dhe produkteve vendore e ndërkombëtare, ndërsa është përmbyllur me një koncert nga këngëtari i njohur, Yll Limani.
