Aksidenti i policëve, Sveçla: Djemtë tanë janë jashtë rrezikut për jetë, shkaqet e aksidentit po hetohen

Ministri i Punëve të Brendshme, Xhelal Sveçla ka bërë të ditur se policët e aksidentuar të premten janë jashtë rrezikut për jetë.

Sveçla në një postim në Facebook shkruan se shkaqet e aksidentit po hetohen, ndërsa theksoi se policët e aksidentuar po marrin kujdesin më të lartë profesional.

Lexoni të plotë postimin:

Sapo mbërrita mbrëmë nga Kroacia vizitova në QKUK tre policët tanë që po marrin trajtim mjekësor. U takova po ashtu edhe me familjarët e kolegët e tyre.

Me Ministrin e Shëndetësisë Arben Vitia takuam mjekët që po përkujdesen për shëndetin dhe trajtimin adekuat. Ata na njoftuan e siguruan se janë duke i trajtuar policët me kujdesin më të lartë profesional.

Teksa gjendja e tyre fatmirësisht po përmirësohet, falënderoj përzemërsisht të gjithë mjekët të cilët nga mbrëmë kanë bërë të pamundurën që policët tanë të kenë kujdesin dhe trajtimin e nevojshëm për rikuperimin e tyre.

Shkaqet e aksidentit po hetohen por jam shumë i lumtur që djemtë tanë janë jashtë rrezikut për jetë.

Iu uroj të kthehen sa më shpejt në detyrë, në shërbim të qytetarëve e vendit tonë. /Telegrafi/