Ahmeti: Partitë politike të shprehin vullnetin dhe gatishmërinë për krijimin e ligjit të ri zgjedhor (Video)

Në emisionin “Përballje” është diskutuar për reformën zgjedhore dhe nevojën për adresimin e kësaj çështjeje nga partitë politike.

Imri Ahmeti nga Lidhja Demokratike e Kosovës, duke folur për mbajtjen e tryezave nga subjektet politike, ka thënë se rrethanat e krijuara kanë determinua edhe këto tryeza, dhe që sipas tij është shumë mirë që ka ide të tilla që të provohet të ndërtohet një konsensus për çështjet që janë aktuale në vend.

“LDK qëndrimet e veta i ka të njohura dhe i ka bërë publike. Ligji zgjedhor është i vitit 2008 ka pasur disa ndryshime amandamentim në vitin 2010 që kanë të bëjnë me PZAP-in, dhe mbajtja e disa zgjedhjeve prej 2008 e deri tash determinon një domosdoshmëri të uljes së akterëve relevantë që kanë të bëjnë me procesin zgjedhor dhe organin e KQZ për të parë se cilat kanë qenë të metat deri tash”, ka thënë Ahmeti në emisionin “Përballje”, transmeton Telegrafi.

Ahmeti ka theksuar se është e nevojshme që partitë politike të shprehin vullnetin dhe gatishmërinë e ndërtimit të një ligji të ri zgjedhor.

Ai po ashtu ka përmendur edhe tri pikat kryesore në kërkesën që ka adresuar LDK-ja ditë më parë.

“Janë tri pika në kërkesën që e ka adresua LDK: e para është që për çështjet kyçe në nivel vendi të ulemi dhe të dakordohemi, e dyta të vendosen parimet me të cilat do të adresohen këto çështje në nivel vendi dhe e treta është përgatitjet teknike për zgjedhjet”, tha Ahmeti. /Telegrafi/